अभिनेता दयाहाङ राई र अभिनेत्री मिरूना मगरले फिल्म 'घरज्वाँइ' को छायांकन सकेका छन्।
रूकुमको लुगुम, तक्सेरालगायतका स्थानमा एक महिनामा फिल्मको छायांकन सकिएको हो। अनिल बुढामगरको कथा एवं निर्देशन रहेको फिल्ममा दयाहाङ र मिरूनासँगै बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, राज थापा, कविता आले, शिला आले, अनु थापा, बिना थापा मगर, खबपु पुन, सोनाम लामा, विवेश बुढा मगर, सुनिल मगरलगायत कलाकारको अभिनय छ।
निर्माण टिमका अनुसार कलाकार र मौसमको साथले निर्धारित समयभन्दा अगावै फिल्मको छायांकन सकिएको हो। जनक घर्ती मगर निर्माता रहेको फिल्म २०८१ को असार २८ गतेदेखि प्रदर्शन हुनेछ।
फिल्ममा अनिल बुढा मगर, विनोद खतिवडा र सुभाष कोइरालाको लेखन छ। सुसन प्रजापतिको छायांकन रहेको फिल्मको गीतमा हर्क साउद र मनोज थापाको शब्द तथा संगीत, रामजी लामिछानेको कोरियोग्राफी रहनेछ। 'घरज्वाँइ' लाई आरआर फिल्मसले वितरण गर्नेछ।
