घनश्याम लामिछाने निर्देशित फिल्म 'लण्डन टु पेरिस' को दोस्रो पोस्टर सार्वजनिक भएको छ।
शुक्रबार सार्वजनिक गरिएको पोस्टरमा अभिनेत्री साम्राज्ञी आरएल शाह र डेब्यु अभिनेता निश्चल खड्का तथा अभिनेता कविर खड्का र डेब्यु अभिनेत्री गरिमा शर्मा रोमान्टिक रूपमा प्रस्तुत छन्।
निर्माण पक्षले यसअघि साम्राज्ञी र निश्चललाई प्रस्तुत गर्दै पोस्टर ल्याएको थियो। उक्त पोस्टरलाई सकारात्मक प्रतिक्रिया मिलेपछि दोस्रो पोस्टर सार्वजनिक गरिएको जनाइएको छ।
फिल्ममा साम्राज्ञी, निश्चल, कविर र गरिमासहित रूश्मा थापा, मनिष श्रेष्ठ, मनिष गान्धीलगायत कलाकारको अभिनय छ। निश्चल र गरिमाले यही फिल्मबाट डेब्यु गर्दैछन्।
फिल्मले 'ट्राभल लभस्टोरी' को कथा प्रस्तुत गर्छ। यसको कथा, पटकथा र संवाद प्रदीप भारद्धाजले लेखेका हुन्। अमित बस्नेतको निर्माण रहेको फिल्ममा आरोन बस्नेत, एरियाना बस्नेत तथा परी राना निर्माताका रूपमा छन्।
एबी इन्टरनेशनलको प्रस्तुति रहेको फिल्ममा गौतम प्रोडक्सन र अर्चिड भेस फिल्मस लिमिटेडको निर्माण सहकार्य छ। सनिश खकुरेल र अजित केआर थापा फिल्मको सह-निर्माता हुन् भने अंकित गौतम, सुरज कुँवर र विजय भण्डारी कार्यकारी निर्माता हुन्।
अभेद परवको डिओपी, हर्कुलश बस्नेत, एसडी योगी, बियोण्ड र सलिन मगरको संगीत, सजु चन्द्रनको सम्पादन, सुजिल कर्माचार्यको पाश्र्व संगीत, लंगनेस फर्नान्डेजको कोरियोग्राफी रहेको फिल्मलाई रोहित कट्टेल र रत्न श्रेष्ठको आरआर फिल्मसले नेपालभर वितरण गर्नेछ।
यो फिल्म जेठ २५ गते रिलिज हुँदैछ।
