दयाहाङ राई र मिरूना मगर अभिनीत फिल्म 'घर ज्वाइँ' को पोस्टर सार्वजनिक गरिएको छ।
आइतबार सार्वजनिक दुई पोस्टरमध्ये एउटामा दयाहाङलाई मात्र प्रस्तुत गरिएको छ। बन्दुक बोकेका उनी रिसाहा अवतारमा छन्। अर्को पोस्टरमा मिरूना र दयाहाङ डोको बोकेर हिँडिरहेका छन्। पोस्टरमा दुवैको लुक्स मौलिक लाग्छ।
अनिल बुढा मगर निर्देशित फिल्म 'घर ज्वाइँ' मा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरलगायतको पनि अभिनय छ। जनक घर्ती मगर फिल्मको निर्माता हुन्।
निर्देशक स्वयंको कथा रहेको फिल्ममा उनीसँगै बिनोद खतिवडा र सुभाष कोइरालाको पटकथा तथा संवाद लेखन छ।
पूर्वी रूकुममा छायांकन भएको फिल्मलाई फिल्मलाई सुशन प्रजापतिले खिचेका हुन्। यो फिल्म असार २८ गतेदेखि प्रदर्शन हुनेछ।
