शोभित बस्नेतको निर्देशन रहेको फिल्म 'बद्री बहादुर' को गीत 'मेरो जीवनको' सार्वजनिक गरिएको छ ।
आइतबार ओएसआर डिजिटलको युट्युबमार्फत सार्वजनिक गीतको भिडिओमा फिल्मका मुख्य कलाकारहरू प्रस्तुत छन्।
जयकिशन बस्नेत र छुल्ठिम गुरूङ तथा राजीवजंग बस्नेत र एलिना गुरुङलाई भिडिओमा देख्न सकिन्छ। यो गीतमा उजन नेम्वाङको शब्द, संगीत तथा स्वर छ।
फिल्ममा जयकिशन, छुल्ठिम, राजीवजंग र एलिनाका साथमा धिरेन शाक्य, उत्तम केसी, वर्षा चौलागाईं र निर्देशक बस्नेत स्वयं देखिएका छन्। एक गीतमा अभिनेता सलोन बस्नेत र अभिनेत्री पूजा शर्मा समेतले नृत्य गरेका छन्।
रामकाजी घिमिरेको पटकथा लेखन रहेको फिल्ममा विजय गोपाल दली प्रस्तुतकर्ता तथा मिथुन भोटे निर्माता छन्।
रवि अधिकारी कार्यकारी निर्माता रहेको फिल्म एबी पिक्चर्स फार्म र सलोन-सलिना फिल्मसको ब्यानरमा निर्माण भएको हो।
विनोद सापकोटाको छायांकन, शंकर महर्जनको द्वन्द्व निर्देशन रहेको फिल्मलाई बन्दे प्रसादले सम्पादन गरेका हुन्।
कमेडी जनरामा निर्माण भएको 'बद्री बहादुर' लाई केही समयअघि बलिउड कमेडियन कपिल शर्माले समेत शुभकामना दिएका थिए। फिल्म यही शुक्रबारदेखि प्रदर्शनमा आउँदैछ।
