फिल्म 'खजुरे ब्रो' को पहिलो गीत सार्वजनिक भएको छ। आइतबार काठमाडौंमा एक कार्यक्रमकाबीच निर्माण टिमले 'लभ गर्ने मान्छे' बोलको गीत सार्वजनिक गरेको हो।
अनमोल गुरूङको शब्द एवं संगीत रहेको गीतमा उनीसँगै अनुपम गुरूङको स्वर छ। गीत र भिडिओ दुवै रमाइलो खालको छ। फिल्मका अधिकांश कलाकारहरूलाई भिडिओमा प्रस्तुत गरिएको छ।
सुरज सुनुवारको लेखन एवं निर्देशन रहेको 'खजुरे ब्रो' मा रेयर राई, महेश त्रिपाठी, नीति शाह, नविन मानन्धर, प्रकाश भुजेल, बिनिता थापा मगर, सुष्मा निरौला, पुस्कर कार्की, मनिष राउत, प्रेम सुब्बा, सुजाता राई, शान्तिला तामाङ, पवन लिम्बु, दीप चन्द्र राईलगायत कलाकारको अभिनय छ।
धरानका चर्चित व्यक्ति खजुरे ब्रोको नाम र उही क्यारेक्टरमा कमेडी जनरामा फिल्म बनेको हो। फिल्ममा खजुरे ब्रोको भूमिका रेयर राईले निर्वाह गरेका छन्। नीति शाहले यही फिल्मबाट डेब्यु गर्न लागेकी हुन्।
नविन मानन्धर र निर्देशक सुनुवार निर्माता रहेको फिल्ममा अनिल मानन्धर र पिकेश मानन्धर सह-निर्माता छन्। त्यस्तै डायमण्ड उप्रेती कार्यकारी निर्माता छन्।
शिशिर बिसुंखेको छायांकन रहेको फिल्मलाई मित्र डि गुरूङले सम्पादन गरेका हुन्।
फिल्म 'खजुरे ब्रो' वैशाख २८ गतेदेखि प्रदर्शनमा आउनेछ।
