'माछीले खाने खोलीको लेउ...', 'तिमीलाई देखेपछि आइ लभ यू...' जस्ता हिट गीतका गायक सरोज वली फिल्म निर्माणको तयारीमा जुटेका छन्।
भिडिओ निर्माण एवं निर्देशनमा समेत सक्रिय वलीले आगामी वर्ष फिल्मको कथामा समय दिने र वर्ष २०८२ मा निर्माण गर्ने योजना रहेको बताए।
'कथा नै फिल्मको गुदी हो। त्यसैले कथामा धेरै समय दिने सोच छ। कथाका लागि रिसर्च गर्ने, केही लेखकहरूसँग छलफलमा बस्ने, अग्रजहरूसँग पनि सल्लाह-सुझाव लिने सोचेको छु' वलीले भने, 'कथामा चित्त बुझेपछि मात्रै छायांकनको काम सुरू गर्ने सोच हो।'
फिल्म निर्माण आफ्नो पहिल्यैदेखिको सोच रहेको उनी बताउँछन्। म्युजिक भिडिओको क्षेत्रमा आउनुअघि देखि नै आफूमा फिल्म बनाउने सोच रहेको उनले बताए।
'भिडिओ, सर्टफिल्म, डकुमेन्ट्रीहरू थुप्रै गरेँ। अब गन्तव्य फिल्म पनि हो भन्ने भएपछि तयारी अगाडि बढाएको हुँ' उनले भने, 'यसअगाडिको अनुभवलाई फिल्ममा सदुपयोग गर्नेछु।' वलीकै निर्माण कम्पनीबाट फिल्म बन्नेछ। फिल्म कलेज पढेका युवापुस्तालाई फिल्ममा लिने सोच उनले बनाएका छन्।
वर्ष २०८१ मा फिल्मको कथा तयार पार्नुका साथै एक दर्जन हाराहारी भिडिओ आफ्नै निर्माण र अभिनयमा ल्याउने उनको सोच छ।
सरोज वली स्तरीय भिडिओ निर्माताका रूपमा चिनिन्छन्। पछिल्लो समय उनी भिडिओमा अभिनय समेत गर्दै आएका छन्।
