लोकप्रिय हास्य अभिनेता केदार घिमिरे 'माग्ने बुढा' का छोरा आशिष घिमिरेले टेलिसिरियल निर्देशनमा पाइला चालेका छन्। उनको निर्देशनमा 'रिटायर हल्दार' को दोस्रो सिजन नयाँ वर्षको अवसर पारेर वैशाखदेखि प्रसारणमा आउँदैछ।
आशिषले बुवा केदार 'मेरी बास्सै' मा सक्रिय रहँदा उक्त सिरियलमा अभिनय गरेका थिए। सानैदेखि कलाकारितामा रूचि राख्ने उनी यतिबेला भने स्नातक तहसम्मको पढाइ सकेर गुरूकुल थिएटरमा नाट्य प्रशिक्षण लिइरहेका छन्।
‘रिटायर हल्दार’ को केही एपिसोड छायांकन सकेर प्रसारणमा ल्याउने अन्तिम तयारी गरिएको छ। सिरियल नेपाल टेलिभिजन, मी टिभीका साथै एमटी एभरेष्ट डिजिटल युट्युब च्यानलमा प्रसारण हुनेछ।
सोसल-कमेडी यस सिरियललाई मी टिभीको प्रस्तुतिमा रेस्क्यु क्रिएशन प्रालिले ल्याउन लागेको हो।
सिरियलको कथा श्रीप्रसाद थापाले लेखेका हुन्। निर्मल शर्मा, श्रीप्रसाद थापा, प्रिया रिजाल, रश्मी भट्ट, रेश्मा केसी, मिसेल घिमिरे, केशव सापकोटा, विशाल पहारी, सविना शंकर, शिव श्रेष्ठ, दीप श्रेष्ठ, भूमिका गिरी, रूकु विष्ट, मदन सुवेदी, सन्ध्या खड्का, सोविता खड्का, प्रिज्योल भण्डारीलगायत कलाकारलाई दर्शकले यस सिरियलमा देख्न पाउनेछन्।
लोकराज अधिकारीको शब्द, विनोद खम्बुको संगीत रहेको सिरियलको गीतमा राजेशपायल राईले स्वर दिएका छन्। संयक अधिकारी निर्माता रहेको सिरियलमा सागर खड्काको छायांकन, शौखिन तिमल्सिनाको सम्पादन छ।
