नाटक 'यौटा सपनाको अवसान' अब वेब सिरिजको रूपमा आउने भएको छ।
गतवर्ष मण्डला थिएटरमा महिना दिनसम्म हाउसफुल दर्शकका साथ मञ्चन भएको नाटक कान्तिपुर सिनेमाजमा नयाँ वर्षदेखि आउने भएको हो।
निर्माण कम्पनी गोविन प्रोडक्सन र पौराणिक पिक्चर्सले सिरिजको पोष्टर सार्वजनिक गर्दै नाटकलाई नयाँ दर्शकमाझ लैजाने प्रयास स्वरूप यसलाई ओटिटीमा रिलिज गर्न लागिएको जनाएको छ।
पोस्टरमा नाटकका मुख्य कलाकारहरू दीया मास्के, मेनुका प्रधान, दिव्य देव, विकास जोशी, शेखर चापागाईँ प्रस्तुत छन्।
नाटकका निर्माता गोविन्द पराजुलीले नयाँ दर्शकको खोजी गर्ने क्रममा नयाँ माध्यममा आउने निर्णय गरेको बताए। 'उसबेला नाटक हेर्न छुट्नु भएका नाट्यप्रेमीसँगै संसारभरका दर्शकका लागि सिरिजको माध्यम छानेका छौं',– निर्माता पराजुलीले भने।
वरिष्ठ नाट्य निर्देशक अनुप बरालले निर्देशन गरेको नाटकले आर्थिक मन्दीमा फसेको एक परिवारको कथा प्रस्तुत गर्छ। नाटकमा दीया मास्के, दिव्यदेव, मेनुका प्रधान, रोय, विकाश जोशी, शेखर चापागाईंको मुख्य अभिनय छ। नाटकलाई सिरिजको रुपमा प्रस्तुत गरेर एउटा प्रयोग गर्न लागेको र यसले राम्रो नाटकलाई डिजिटल्ली जोगाएर राख्ने प्रयासले पनि सार्थकता पाएको निर्माता पराजुली बताउँछन्।
कालान्तरमा यसले नाटकको डिजिटल बजार निर्माणमा पनि ठोस सुरूवात गर्ने उनको अपेक्षा छ। सिरिजको वैशाख १ गते प्रिमियर हुनेछ। ७ भागमा सिरिज प्रसारण हुनेछ।
