सुरज सुनुवार निर्देशित फिल्म 'खजुरे ब्रो' को पोस्टर सार्वजनिक भएको छ।
सोमबार निर्माण टिमले सार्वजनिक गरेको पोस्टरमा रेयर राईलाई पैसा बोकेर बसिरहेका आफ्ना साथी महेश त्रिपाठीसँग मोटरसाइकलमा खुसी मुद्रामा देख्न सकिन्छ।
एकातिर पैसाले यी दुई पात्रलाई दिलाएको खुसी देख्न सकिन्छ भने अर्कोतर्फ खजुरेले यो खुसीमा आफूले मनपराएकी सुन्दरी युवती (नीति शाह) लाई याद गरिरहेको पनि देख्न सकिन्छ। साथै पोस्टरमा अर्का कलाकार नविन मानन्धरलाई पनि स्थान दिइएको छ। पोस्टरमा उनलाई कुनै तहको परिक्षामा दीक्षित भएपछिको खुसी मुद्रालाई प्रस्तुत गरिएको छ।
फिल्मले धरान र आसपासका क्षेत्रमा चर्चित रहेका खजुरे पात्रको कथा पेस गर्छ। धरान आसपासमा डुलिहिँड्ने यी पात्रको केही वर्ष अगाडि मृत्यु भइसकेको छ।
फिल्ममा रेयर, महेश, नीति र नविनसँगै प्रकाश भुजेल, बिनिता थापा मगर, सुष्मा निरौला, पुस्कर कार्की, मनिष राउत, प्रेम सुब्बा, सुजाता राई, शान्तिला तामाङ, पवन लिम्बु, दीप चन्द्र राईलगायत कलाकारको अभिनय छ।
कलाकार नविन मानन्धर तथा निर्देशक सुनुवारको निर्माण रहेको फिल्ममा सुनील श्रेष्ठ, अनिल मानन्धर र पिकेश मानन्धर सह–निर्माता छन्। डायमण्ड उप्रेती कार्यकारी निर्माता हुन्।
शिशिर बिसंखेको छायांकन रहेको फिल्ममा मित्र डि गुरूङको सम्पादन छ। यो फिल्म वैशाख २८ गतेदेखि प्रर्दशन हुनेछ।
