अभिनेत्री केकी अधिकारीको व्यस्तता पछिल्लो समय थप बढेको छ। होम प्रोडक्सनको फिल्म 'बोक्सीको घर' को प्रदर्शन मिति नजिकिरहँदा उनी यसको प्रचारप्रसारमा व्यस्त छिन्।
अर्कोतर्फ विदेशका कार्यक्रममा समेत उनी सहभागी हुँदैछिन्। आइतबार आफ्नो होम प्रोडक्सनको फिल्म 'बोक्सीको घर' को ट्रेलर सार्वजनिक गरेकी केकी सोमबार बिहान बहराइन उडेकी छन्। गायक पशुपति शर्मा र गायिका मिलन नेवारका साथ सांगीतिक कार्यक्रमका लागि उनी त्यसतर्फ प्रस्थान गरेकी हुन्।
गैरआवासीय नेपाली संघ बहराइनले इदको अवसरमा आयोजना गरेको 'सांगीतिक साँझ २०२४' मा फिल्म र सांगीतिक क्षेत्रका यी चर्चित कलाकारहरूले प्रस्तुति दिन लागेका हुन्।
मनामास्थित डेलमन इन्टरनेशनल होटलमा इदको पहिलो दिन कार्यक्रम हुन लागेको हो।
नेपालका दुर्गम क्षेत्रका बालबालिकाहरूको शैक्षिक सहयोगार्थ कार्यक्रम राखिएको आयोजकले जनाएको छ।
कलाकारहरू बहराइन प्रस्थान गर्दै गर्दाका तस्बिरमा अर्का गायक किरण भुजेल पनि देखिएका छन्।
