'वरिष्ठे' उपनामले दर्शकमाझ चिनिएका कलाकार एवं निर्देशक शंकर आचार्यले शुक्रबारदेखि नयाँ सिरियल प्रसारणमा ल्याउने भएका छन्।
सामाजिक कथावस्तुमा रहेर उनले सिरियल 'विधुवाको सिन्दूर' प्रसारणमा ल्याउन लागेका हुन्।
सिरियलमा उनको लेखन एवं निर्देशनसहित अभिनय समेत रहनेछ। उनीसहित विद्या कार्की, अस्मिता तामाङ, दिप्सन कार्की, हिमाल चौलागाईँलगायत कलाकारहरू सिरियलमा देखिनेछन्।
हरेक शुक्रबार बेलुका ७ः३० बजे 'वरिष्ठे इन्टरटेन्मेन्ट' युट्युब च्यानलमा सिरियल प्रसारण हुनेछ।
शंकर आचार्य टेलिभिजन शृंखलाका चर्चित कलाकार हुन्। कमेडी टेलिशृंखला 'भद्रगोल' को सुरूवाती समयका निर्देशक समेत रहेका उनी सोही सिरियलबाट 'वरिष्ठे' उपनामले परिचित हुन पुगेका थिए। उनले बोल्ने थेगो 'हजुर वरिष्ठ हस् त नमस्ते' दर्शकमाझ चर्चित मानिन्छ।
शंकरले 'विधुवाको सिन्दूर' को शीर्ष गीत र अफिसियल ट्रेलर समेत ल्याइसकेका छन्। मेहनतका साथ सिरियल ल्याउन लागेको बताउँदै उनले दर्शकले रूचाउने विश्वास व्यक्त गरे।
