चैतको दोस्रो साता कमेडी रियालिटी शो 'कमेडी च्याम्पियन' को टिम चढेको कार दुर्घटना भयो। दुर्घटनामा शोका निर्देशक विशाल भण्डारीसहित ६ जना घाइते भए। कमेडी च्याम्पियन सिजन ३ को प्रसारण दुई साता रोकिन पुग्यो।
यतिबेला घाइतेहरू अस्पतालबाट डिस्चार्ज भइसकेका छन् भने गम्भीर घाइते भनिएका सुशान्त बस्यालको स्वास्थ्यमा पनि उल्लेख्य सुधार आएको जनाइएको छ। रोकिएको शोको प्रसारण पनि बिहीबारदेखि फेरि सुरू हुँदैछ।
यसैबीच शोका निर्देशक विशाल भण्डारीले दुर्घटनाले धेरै कुरा सिकाएको बताएका छन्। बिहीबार र शुक्रबार प्रसारण हुन लागेको एपिसोडको ट्रेलर फेसबुकमा सेयर गर्दै उनले दुर्घटनाले आफूलाई झक्झक्याएको उल्लेख गरेका छन्। ‘दुर्घटनाले हामीलाई र विशेष गरी मलाई धेरै कुरा सिकाएको छ र झक्झकाएको छ’ उनले लेखेका छन्।
जीवन एक भोगाइ भएको धारणा राख्दै नतिजा कहिले सही र कहिले गलत भइदिने समेत उल्लेख गरेका छन्। आगामी दिनमा गल्ती-कमजोरीलाई संस्थागत सुधार गर्दै थ्रि प्रोडक्सन टिमको सम्पूर्ण शक्ति कार्यक्रमको निर्माण र दर्शकको अपेक्षा अनुसारको कन्टेन्ट बनाउनमा खर्च गर्ने प्रणसमेत उनले गरेका छन्।
सबैले भोगेरै सिक्नुपर्छ भन्ने नभएको बताउँदै मदिरा पिएर गाडी नचलाउन समेत सुझाव दिएका छन्। 'कमेडी च्याम्पियन' को बिहीबार प्रसारण हुने एपिसोडमा अभिनेता दयाहाङ राई र अभिनेत्री आँचल शर्मालाई अतिथिका रूपमा दर्शकले हेर्न पाउनेछन्।
