लोकप्रिय रियालिटी शो 'कमेडी च्याम्पियन' को तेस्रो सिजनमा उत्कृष्ट १० प्रतिस्पर्धी छानिएका छन्। शोको बिहीबार प्रसारण एपिसोडमा 'टप टेन' प्रतिस्पर्धीलाई मञ्चमा स्वागत गरिएको थियो।
रिसभ काफ्ले, सुनिल खड्का, सन्देश देवकोटा, अमरेन्द्र यादव, विरेन प्रधान, कृष्ण गहिरे, सुयशा खनाल, अच्युत काफ्ले, निश्चल अर्याल र सन्देश सुवेदी उत्कृष्ट १० मा पर्न सफल भएका हुन्। जसमध्ये कृष्ण गहिरे, सुयशा खनाल, अच्युत काफ्ले, निश्चल अर्याल र सन्देश सुवेदीले बिहीबारको एपिसोडमा प्रस्तुति दिँदै दर्शकसँग भोट समेत मागे। बाँकी ५ प्रतिस्पर्धीको प्रस्तुति दर्शकले शुक्रबार हेर्न पाउनेछन्।
कान्तिपुर टेलिभिजनमा प्रसारण हुने शो 'कमेडी च्याम्पियन' लाई विशाल भण्डारीले निर्देशन गरिरहेका छन्।
सन्तोष पन्त, मनोज गजुरेल, प्रदीप भट्टराई र ऋचा शर्मा निर्णायक रहेको शोमा रीमा विश्वकर्मा र मेक्सम गौंडेल होस्टका रूपमा छन्।
लोकप्रिय यो शोको तेस्रो सिजनमा करिब २ हजारले डिजिटल अडिसनमा सहभागिता जनाएका थिए। त्यसबाट प्रि–जजिङ हुँदै १ सय ३२ जना फिजिकल अडिसनमा सहभागि थिए। त्यसबाट उत्कृष्ट ३०, उत्कृष्ट १६ हुँदै अहिले उत्कृष्ट १० प्रतिस्पर्धी छनोट गरिएको हो।
शोको फिनाले असार पहिलो हप्ता गर्ने तयारी छ। 'कमेडी च्याम्पियन' का विजेताले २५ लाख रुपैयाँ नगद र सोही मूल्य बराबरको कार पुरस्कार पाउनेछन।
