सुरज सुनुवार निर्देशित फिल्म 'खजुरे ब्रो' को टिजर सार्वजनिक भएको छ।
शुक्रबार बुढासुब्बा युट्युब च्यानलमार्फत फिल्मको टिजर सार्वजनिक गरिएको हो। सार्वजनिक टिजरमा खजुरे ब्रोको अतरंगी हाउभाउदेखि मित्रता र रोमान्सका प्रसंगलाई देखाइएको छ।
फिल्ममा रेयर राई, महेश त्रिपाठी, नीति शाह, नविन मानन्धर, प्रकाश भुजेल, बिनिता थापा मगर, सुष्मा निरौला, पुस्कर कार्की, मनिष राउत, प्रेम सुब्बा, सुजाता राई, शान्तिला तामाङ, पवन लिम्बु, दीप चन्द्र राईलगायत कलाकारको अभिनय छ।
धरानका चर्चित व्यक्ति खजुरे ब्रोको नाम र उही क्यारेक्टरमा कमेडी जनरामा फिल्म बनेको हो। फिल्ममा खजुरे ब्रोको भूमिका रेयर राईले निर्वाह गरेका छन्। नीति शाहले यही फिल्मबाट डेब्यु गर्न लागेकी हुन्।
नविन मानन्धर र निर्देशक सुनुवार निर्माता रहेको फिल्ममा अनिल मानन्धर र पिकेश मानन्धर सह–निर्माता छन्। त्यस्तै डायमण्ड उप्रेती कार्यकारी निर्माता छन्।
शिशिर बिसुंखेको छायांकन रहेको फिल्मलाई मित्र डि गुरूङले सम्पादन गरेका हुन्।
यो फिल्म वैशाख २८ गतेदेखि प्रदर्शन हुनेछ।
