अभिनेता अनमोल केसी र अभिनेत्री जसिता गुरूङ अभिनीत फिल्म 'फर्की फर्की' आउँदो जेठ १० गते रिलिज हुँदैछ। फिल्मको प्रदर्शन मिति नजिकिँदै गर्दा निर्माण टिमले प्रचारप्रसार पनि सुरू गरेको छ।
यो बीचमा नयाँ वर्षको छेको पारेर फिल्मको पोस्टर सार्वजनिक गरिएको छ। जसमा अनमोललाई जसितासँग रोमान्टिक मूडमा देख्न सकिन्छ। दुवैजना पानीमा भिज्दै गरेको पोस्टरमा देखिन्छ।
आउँदो बिहीबार फिल्मको ट्रेलर सार्वजनिक गर्ने तयारी छ। लभस्टोरी जनरामा रूचाइएका अनमोल यो फिल्मलाई लिएर निकै उत्साहित रहेको बताउँदै आएका छन्।
रोहित अधिकारी फिल्मसको प्रस्तुति र ओएसआर डिजिटलसँगको सहकार्यमा निर्माण भएको 'फर्की फर्की' लाई सुयोग गुरुङले निर्देशन गरेका हुन्।
फिल्ममा अनमोल र जसितासहित रवि काफ्ले र समृद्दि अर्याल पनि मुख्य भूमिकामा देखिनेछन्।
ओमप्रकाश अग्रवाल निर्माता रहेको फिल्ममा मनोज वली र रामु न्यौपाने सह–निर्माताको रूपमा छन्। फिल्ममा अरूण रिजालको पनि लगानी छ।
सुयोग गुरूङको कथा एवं पटकथा, नरेन्द्र मैनालीको छायांकन रहेको फिल्मको सम्पादक सुरेन्द्र पौडेल हुन्।
