सफल फिल्म 'होस्टेल' को तेस्रो शृंखला निर्माण हुने भएको छ। बुधबार बिहान एक पोस्टर सार्वजनिक गर्दै 'होस्टेल ३' निर्माणको घोषणा गरिएको हो।
सशान कंडेलको निर्देशनमा बन्न लागेको फिल्मको लागि माधव शर्माले स्क्रिप्ट लेखेका छन्। निर्देशक कंडेलकै कथा रहने फिल्मको निर्मातामा शिशिर ज्ञवाली छन्।
यसअघि 'होस्टेल' र 'होस्टेल रिटन्र्स' लाई सुनिल रावलले निर्माण गरेका थिए। 'होस्टेल ३' मा भने उनको लगानी रहने छैन। उनले आफू पनि एक महत्वपूर्ण कलाकार रहने गरी सम्मान इन्टरटेन्मेन्टलाई फिल्म बनाउन अनुमति दिएका हुन्।
सम्मान इन्टरटेन्मेन्टले आरोन कन फिल्मससँगको सहकार्यमा 'होस्टेल ३' बनाउनेछ। फिल्मको कार्यकारी निर्मातामा शंकर कोइराला, सह–निर्मातामा सुधा मरहट्ठा, सुरेश कंडेल र अर्जुन सापकोटा रहेका छन्।
'होस्टेल' शृंखलाबाट थुप्रै कलाकारहरू फिल्म क्षेत्रमा उदाएका थिए। २०७० सालमा रिलिज भएको हेमराज बिसी निर्देशित 'होस्टेल' बाट अनमोल केसी, सलोन बस्नेत, प्रकृति श्रेष्ठ, गौरव पहारीलगायत कलाकारहरूले अभिनेता अभिनेत्रीका रूपमा डेब्यु गरेका थिए।
त्यस्तै, २०७२ मा रिलिज भएको सुरज भुसाल निर्देशित 'होस्टेल रिटन्र्स' बाट स्वस्तिमा खड्का, सुशील श्रेष्ठ, नाजिर हुसेन, सुशील सिटौलालगायत कलाकारहरूले डेब्यु गरेका थिए। राम्रो व्यापार गरेका यी दुवै शृंखला 'टिनएज ड्रामा' मा आधारित थिए।
'होस्टेल ३' होस्टेलमा बसेर अध्ययन गरिरहेका टिनेजर र उनीहरूको भविष्यका घटनाहरूमा आधारित रहने निर्माण हुने निर्देशक कँडेलले बताए। पहिलो पटक फिल्म निर्देशन गर्न लागेका उनी डेढ दशकदेखि गायन र म्युजिक भिडिओ निर्देशनमा सक्रिय छन्।
यस वर्षको अन्त्यतिर रिलिज लक्ष्यका साथ फिल्मको काम अघि बढ्ने निर्देशक कंडेलले बताए।
