अभिनेत्री नीता ढुंगाना र युवा ज्योतिष एवं अभिनेता हरिहर अधिकारीको जोडीले निर्माण गरेको फिल्म 'ह्रस्व दीर्घ' को नयाँ पोस्टर सार्वजनिक गरिएको छ। बुधबार हरिहरको जन्मदिनको अवसर पारेर उनको 'क्यारेक्टर पोस्टर' सार्वजनिक गरिएको हो।
नीताले हरिहरलाई 'ह्याप्पी बर्थडे हिरो' भन्दै पोस्टर सेयर गरेकी छन्। हरिहरले पनि फिल्मको पोस्टर आफ्नो वालमा सेयर गरेका छन्। पोस्टरमा उनको क्यारेक्टरका दुई स्वरूप देख्न सकिन्छ।
चन्द्र पन्तको निर्देशन रहेको फिल्म दसैंको अवसर पारेर असोज ११ गतेदेखि प्रदर्शनमा आउनेछ। हरिहर अधिकारीको कथा, नीता ढुंगाना निर्माता रहेको फिल्ममा यी दुई स्वयं मुख्य भूमिकामा छन्। फिल्ममा नेपाली तथा भारतीय चर्चित कलाकारको अभिनय छ।
नीता र हरिहरसँगै विपना थापा, सरोज खनाल, गरिमा शर्मा, सञ्चिता लुइँटेल, बुद्धि तामाङ, किरण केसी, प्रशान्त ताम्राकार, रविन्द्र झालगायत नेपाली कलाकारले फिल्ममा अभिनय गरेका छन् भने भारतीय कलाकार ब्रह्मानन्दम तथा विजय रावतको समेत अभिनय छ।
कबीर लालले फिल्मलाई छायांकन गरेका हुन्।
