अभिनेता दयाहाङ राई र अभिनेत्री मिरूना मगरको मुख्य भूमिका रहेको फिल्म 'मनसरा' को ट्रेलर सार्वजनिक गरिएको छ।
बुधबार काठमाडौंमा एक कार्यक्रमकाबीच उपेन्द्र सुब्बाको लेखन एवं निर्देशनमा बनेको यस फिल्मको ट्रेलर सार्वजनिक गरिएको हो। ४ मिनेट २७ सेकेन्डको ट्रेलरमा दयाहाङ र मिरूनासहित अभिनेता प्रवीण खतिवडा र अभिनेत्री मेनुका प्रधानलाई प्रस्तुत गरिएको छ।
सामाजिक कथामा निर्माण भएको 'मनसरा' मा शान्ती गिरी, हेमन्त बुढाथोकी, नीनाहाङ राई, विप्लव प्रतीक, जीवन बराल, सुवासचन्द्र खरेललगायत कलाकारहरूको समेत अभिनय छ।
२०८० सालको सुपरहिट फिल्म 'जारी' का निर्देशक उपेन्द्र सुब्बाको 'मनसरा' दोस्रो फिल्म हो। यो फिल्मको निर्मातामा छायांकार समेत रहेका शैलेन्द्र कार्की छन्।
वैशाख २१ गतेदेखि फिल्म प्रदर्शनमा आउनेछ।
बिहीबारदेखि 'कविता कन्सर्ट'
'मनसरा' को प्रमोसनका लागि निर्माण टिमले विभिन्न सहरमा कविता कन्सर्ट गर्दैछ। बिहीबार बेलुका ६ बजे बुटवलको क्युएफएक्स हलदेखि कविता कन्सर्टको सुरूआत हुँदैछ।
कवि एवं 'मनसरा' का निर्देशक उपेन्द्र सुब्बासहित कलाकारहरू मिरूना मगर, प्रवीण खतिवडा र मेनुका प्रधान समेत यो कन्सर्टमा सहभागी हुनेछन्।
बुटवलपछि पोखरा, बिर्तामोड, धरान र इटहरीमा कविता कन्सर्ट हुने जनाइएको छ।
