फिल्म 'पूर्ण बहादुरको सारंगी' निर्माण हुने भएको छ। नेपाली फिल्मको अन्तर्राष्ट्रिय वितरणमा सक्रिय रहँदै आएको सेभेन सिज इन्टरटेनमेन्टले फिल्म बनाउने भएको हो।
शुक्रबार मोसन पोस्टर सार्वजनिक गर्दै औपचारिक निर्माण घोषणा गरिएको फिल्मलाई २०८२ सालभित्र विश्व बजारमा प्रदर्शन गर्ने लक्ष्य राखिएको छ।
सार्वजनिक पोस्टरअनुसार मौलिक कथामा फिल्म निर्माण हुनेछ। मोसन पोस्टरमा ग्रामीण भेगको बाटोमा एक व्यक्ति सारंगी र बच्चा बोकेका हिँडेका छन्। अगाडि बुढो रूख देखिएको छ।
सारंगी बजाएर गुजारा चलाउने परिवारको बाध्यता र सन्तानप्रतिको त्यागको कथा फिल्मले प्रस्तुत गर्ने मोसन पोस्टरका आधारमा अनुमान गर्न सकिन्छ।
विनोद पौडेल र प्याट्रिक सुवेदीको लगानी रहने यो फिल्मलाई सरोज पौडेलले लेखन तथा निर्देशन गर्न लागेका हुन्।
रमेश चौलागाई र हरि श्रेष्ठ कार्यकारी निर्माता रहेको फिल्ममा महेश दवाडीको पटकथा तथा संवाद, प्रशान्त सिवाकोटीको संगीत रहनेछ।
