टेलिसिरियल 'रिटायर हल्दार २' को ट्रेलर सार्वजनिक भएको छ। आशिष घिमिरेको निर्देशनमा बनेको सिरियल आगामी सातादेखि प्रसारणमा आउँदैछ।
सोसल–कमेडी जनराको सिरियललाई मी टिभीको प्रस्तुतिमा रेस्क्यु क्रिएशन प्रालिले ल्याउन लागेको हो।
वैशाख १७ गतेदेखि हरेक सोमबार बेलुका सिरियल प्रसारणमा ल्याउन लागिएको छ। नेपाल टेलिभिजनमा ७ः३० बजे, मी टिभीमा ८ बजे साथै एमटी एभरेष्ट डिजिटल युट्युब च्यानलमा ८ः३० बजे सिरियल हेर्न सकिने जनाइएको छ।
सिरियलमा श्रीप्रसाद थापा, निर्मल शर्मा, प्रिया रिजाल, रश्मी भट्ट, रेश्मा केसी, केशव सापकोटा, दीप श्रेष्ठ, मिसेल घिमिरे, सविना शंकर, शिव श्रेष्ठ, प्रिज्योल भण्डारी, भूमिका गिरीलगायत कलाकारलाई दर्शकले हेर्न पाउनेछन्।
सार्वजनिक ट्रेलरमा अधिकांश कलाकारहरूलाई समावेश गरिएको छ।
सिरियललाई श्रीप्रसाद थापाले लेखेका हुन्। संयक अधिकारी कार्यकारी निर्माता रहेको सिरियलमा सागर खड्काको छायांकन, शौखिन तिमल्सिनाको सम्पादन रहनेछ।
यस सिरियलका निर्देशक आशिष लोकप्रिय हास्य अभिनेता केदार घिमिरेका छोरा हुन्। सानैदेखि कलाकारितामा रूचि राख्ने उनले बुवा ‘मेरी बास्सै’ मा सक्रिय रहँदा उक्त सिरियलमा अभिनय समेत गरेका थिए।
अहिले स्नातक तहसम्मको पढाइ सकेर गुरूकुल थिएटरमा नाट्य प्रशिक्षण लिइरहेका आशिषले 'रिटायर हल्दार २' बाट निर्देशनमा पाइला चालेका हुन्।
