पारिवारिक कथामा नयाँ टेलिसिरियल 'ठूल्दिदी' निर्माण हुने भएको छ। प्रज्ञा जोशीको निर्देशनमा निर्माण हुन लागेको सिरियलको शुक्रबार बिहान काठमाडौंमा मुहूर्त गरिएको छ।
सिरियलमा प्रज्ञा जोशी, विष्णु रिजाल, माधव खनाल, आयुश्का बुढाथोकी, विमल धमला र विनयराज पौडेलको अभिनय रहनेछ।
वैशाख अन्तिमदेखि छायांकनमा जाने तयारीमा रहेको टेलिसिरियलको प्रसारण मिति भने तय गरिएको छैन। ओएसआर डिजिटलसँगै एक टेलिभिजनमा सिरियल प्रसारणमा ल्याइने जनाइएको छ।
यसकी निर्देशक प्रज्ञाले निर्माण गरेको 'सिन्दुर' हिट टेलिसिरियलमा पर्दछ। उनले यसअघि 'सम्झना', 'नोटबुक', 'सपुत', 'न बिर्से तिमीलाई' लगायतका फिल्म समेत निर्माण गरेकी छन्।
प्रज्ञा फिल्मसको प्रस्तुतिमा निर्माण हुने 'ठूल्दिदी' सिरिजमा लय संग्रौलाको लेखन र गीत, विकास चौधरीको संगीत, प्रिया नगरकोटीको श्रृंगार, विमल धमलाको प्रोडक्सन र मदनकश्यप घिमिरेको छायांकन रहनेछ।
