सामाजिक विषयवस्तुमा निर्माण भएको फिल्म 'आँखा' असार १४ गतेदेखि प्रदर्शनमा आउने भएको छ।
शुक्रबार फिल्मको फस्र्टलुकसँगै थिम पोस्टर सार्वजनिक गर्दै प्रदर्शन मिति घोषणा गरिएको हो। लामा सिनेमा प्रालीको प्रस्तुति रहेको फिल्मलाई जौन योन्जनले लेखन एवं निर्देशन गरेका हुन्।
वितरक कम्पनीसँगको सल्लाहमा फिल्मको प्रदर्शनलाई असार दोस्रो साता रोजेको निर्देशक योन्जनले बताए।
रोयल भिमसेनले तयार पारेका सार्वजनिक पोस्टरमध्ये एउटामा प्रायः सबैजसो प्रमुख कलाकारहरू देखिएका छन्। 'आँखा' भित्र कलाकारहरूलाई प्रस्तुत गरिएको छ भने त्यसको बिचमा सूर्यमुखी फूललाई समेत जोडिएको छ। अर्को थिम पोस्टरमा फोहोरको थुप्रोमाथि सूर्यमुखी फुलेको देखिन्छ।
फिल्ममा स्मिता लामिछाने, आरके मेहता, निशा अधिकारी, बुद्धि तामाङ, पशुपति राई, विजय बराल, प्रविण खतिवडा, राजन खतिवडा, अभयराज बराल, सरोज खनाल, कृष्णभक्त महर्जन, लुनिभा तुलाधर, रविन्द्र झा, रेनुका कार्कीलगायत कलाकारहरूको अभिनय छ। बाल कलाकारको भूमिकामा प्रसन राई छन्।
स्मिता लामिछाने निर्माता रहेको फिल्मलाई आलोक शुक्लाले छायांकन, कृष्ण भण्डारी र निर्देशक योन्जनले सम्पादन गरेका छन्।
फिल्ममा संगीत दिपक आरजेको छ भने द्वन्द्व निर्देशकमा रेवन्तविक्रम थापा छन्। ढाका टोपी फिल्मस्, कार्यक्रम नेपाल, साइलेन्ट एक्ट र ट्राइडेन्ट कन्सेप्टको सहकार्यमा यो फिल्म तयार भएको हो।
'आँखा' लाई आरआर फिल्मसले वितरण गर्नेछ।
