फिल्म 'मनसरा' शुक्रबारदेखि प्रदर्शनमा आएको छ। उपेन्द्र सुब्बाको लेखन एवं निर्देशन रहेको फिल्ममा मिरूना मगर, दयाहाङ राई, प्रविण खतिवडा, मेनुका प्रधानलगायत कलाकारहरूको अभिनय छ।
गत वर्षको हिट फिल्म 'जारी' पछि उपेन्द्रले यो फिल्म बनाएका हुन्।
बुधबार गरिएको प्रिमियरमा सकारात्मक प्रतिक्रिया पाएको फिल्मले राम्रो व्यापार गर्ने अपेक्षा छ। सामाजिक कथामा निर्माण भएको फिल्मको निर्माता शैलेन्द्र कार्की हुन्।
त्यस्तै, शुक्रबारदेखि नेपाली हलमा हलिउड फिल्म 'द फल गाइ' पनि प्रदर्शनमा आएको छ। डेभिड लिच निर्देशित फिल्ममा रायन गोस्लिङ, एमिली ब्लन्ट, हन्ना वडिङ्घमको अभिनय छ। यो एक्सन, कमेडी जनराको फिल्म हो।
'बोक्सीको घर' दोस्रो सातामा
वैशाख १४ गतेदेखि प्रदर्शनमा आएको फिल्म 'बोक्सीको घर' शुक्रबारदेखि दोस्रो सातामा प्रवेश गरेको छ।
फिल्मले पहिलो साता ६ करोड रूपैयाँ हाराहारी ग्रस कलेक्सन गरेको यसको वितरक कम्पनीले जानकारी दिएको छ। दोस्रो सातामा पनि हलमा फिल्मको दबदबा कायमै देखिएको छ।
सुलक्षण भारतीको लेखन एवं निर्देशन रहेको फिल्ममा केकी अधिकारी, सुपला सापकोटा, स्वेच्छा राउत, रमा थपलिया, सुष्मा निरौला, जिवन बराल, सविन बास्तोलालगायत कलाकारहरूको अभिनय छ।
केकी अधिकारीको होम प्रोडक्सनबाट यो फिल्म निर्माण भएको हो। फिल्मले राम्रो व्यापार गरेसँगै यसको दोस्रो भागको समेत निर्माण घोषणा भइसकेको छ।
