अभिनेता दयाहाङ राई र अभिनेत्री मिरूना मगरको आगामी फिल्म 'घरज्वाइँ' को टिजर सार्वजनिक गरिएको छ।
आइतबार दिउँसो सार्वजनिक टिजरमा आफूले मन पराएकी मिरूनालाई पाउन दयाहाङले गरेको संघर्षलाई प्रस्तुत गरिएको छ।
मगर संस्कार र संस्कृतिमा बनेको फिल्मलाई अनिल बुढा मगरले लेखन तथा निर्देशन गरेका हुन्।
जनक घर्ती मगर निर्माता रहेको फिल्ममा दयाहाङ र मिरूनाका साथमा बुद्दि तामाङ, पुष्कर गुरुङ, शिशिर बाङ्देल, राज थापा मगर, कविता आले मगर, भोलाराज सापकोटा, खड्कबहादुर पुन (खबपु), शिला आले, अनु थापालगायत कलाकारहरूको पनि अभिनय छ।
यसको पटकथा तथा संवाद लेखनमा निर्देशक अनिललाई बिनोद खतिवडा र सुभाष कोइरालाले सघाएका छन्।
पूर्वी रूकुम आसपासमा खिचिएको फिल्मको छायांकार सुशन प्रजापति हुन्।
ए.बि.एम. सिनेमा प्रोडक्सनसँगको सहकार्यमा जि. एम मुभिजले प्रस्तुत गरेको फिल्मलाई कृष्ण भण्डारीले सम्पादन गर्नेछन्।
'घरज्वाइँ' लाई नेपालमा आरआर फिल्मसले वितरण गर्नेछ भने अन्तर्राष्टिय प्रदर्शन अधिकार एमएसएम अस्ट्रेलियाले लिएको छ।
फिल्म असार २८ गतेदेखि प्रदर्शनमा आउनेछ।
