अभिनेता सौगात मल्ल र अभिनेत्री बेनिशा हमालको मुख्य अभिनय रहेको फिल्म 'सिटामोल' को जापान प्रदर्शन अधिकार बिक्री भएको छ।
राज बहादुर सानेको निर्देशनमा निर्माण भएको फिल्मको जापान प्रदर्शन अधिकार गरिमा फिल्मसले किनेको हो। नेपाल र जापानमा एकैदिन रिलिज गर्ने सहमतिअनुसार प्रदर्शन अधिकार बेचिएको निर्माण टिमले जनाएको छ।
निर्देशक सानेले फिल्मको प्रदर्शन मिति घोषणा नहुँदै विदेश राइट्स बिक्री हुन थालेपछि 'सिटामोल' लाई सबै हिसाबले अब्बल बनाउनुपर्ने चुनौती थपिएको बताए। अन्य देशबाट पनि प्रदर्शन अधिकारको लागि कुरा भइरहेकाले चाँडै प्रदर्शन मिति घोषणा गरेर प्रचारमा जुट्ने तयारी रहेको उनले बताए।
माओवादी जनयुद्दको कथा उठान गरेको 'सिटामोल' को अहिले पोष्ट प्रोडक्शनको काम भइरहेको छ। तुलसी देवी फिल्म प्रालीको ब्यानरमा निर्माण भएको फिल्ममा सौगात र बेनिशासहित लोकेन्द्र लेखक, भुगोल कार्की, हिउँवाला गौतम, दिनेश रेग्मी, समिप निरौला, जानुका विश्वकर्मा, ज्ञानु सेञ्चुरी, पवन भट्टराई, काजल भुजेल र बालकलाकार करण नेपाली र आराध्या राज्यलक्ष्मी डिसी लगायतको अभिनय छ।
भुगोल कुमार कार्की निर्माता रहेको फिल्ममा रामचन्द्र उपाध्याय, अप्सरा नेपाली, गंगाराम श्रेष्ठ, अजय कुमार बिक र कुमार केसी कार्यकारी निर्माता छन्।
फिल्मलाई दिव्य सुवेदीले खिचेका हुन्।
