अभिनेत्री पूजा शर्मा अभिनीत एक्सन-रोमान्टिक फिल्म 'दान्भी' को पहिलो गीत सार्वजनिक गरिएको छ।
शुक्रबार बुढासुब्बा डिजिटलको युट्युबमार्फत 'मायाको खानी' बोलको गीत सार्वजनिक गरिएको हो। यो गीतको भिडिओमा पूजा र नव–अभिनेता कुन्साङ बोम्जन प्रस्तुत छन्। उनीहरू भिडिओमा रोमान्टिक देखिएका छन्।
सुरेश लामा र ममता गुरुङको स्वर रहेको गीतमा अर्जुन पोखरेलको संगीत, प्रदिप प्रखर पोखरेलको शब्द छ।
रूपेश तामाङको निर्देशनमा तयार भएको फिल्म 'दान्भी' मा देव मगर र अनुप गडाल निर्माताको रूपमा छन्। पवन राना मगर कार्यकारी निर्माता रहेको फिल्ममा कमला लिम्बु, पन्च बहादुर तामाङ र आदर्श पौडेल सह–निर्माता छन्।
फिल्ममा रविना थापा मगरको कथा, सन्जोग कुवँर रानाको पटकथा र संवाद, श्री श्रेष्ठको एक्सन, कविराज गहतराज र रामजी लामिछानेको कोरियोग्राफी छ। हरि बहादुर घलेको डीओपी रहेको फिल्मलाई बन्दे प्रसादले सम्पादन गरेका हुन्।
अभिनेत्री पूजाले आफ्नो करिअरमा पहिलो पटक एक्सन भूमिका निर्वाह गरेको यो फिल्म 'दान्भी' असार ७ गतेबाट प्रदर्शनमा आउने तयारीमा छ।
