कवितामा आधारित रियालिटी शो 'द पोएट आइडल’ सिजन २ को उपाधि सिक्किमका सिमियोन सुकिता राईले जितेका छन्।
शनिबार राति भएको फिनालेमा उनले अन्य तीन प्रतिस्पर्धीलाई पछि पार्दै उपाधि हात पारेका हुन्।
सिमियोनसहित धनगढीका मोहित जोशी, धादिङकी मुस्कान पोखरेल र इलामका विजय लुइँटेल फिनालेमा पुगेका थिए।
सिमियोनले उपाधि ट्रफीसँगै नगद १० लाख रूपैयाँ प्राप्त गरे। एभरेस्ट फिल्म एकेडेमीको तर्फबाट १ वर्षको स्नातक अध्ययनको छात्रवृत्ति, प्रकाशक कथालयसँग पुस्तकको सम्झौता, उत्पला क्याफेको तर्फबाट १ लाख बराबरको गिफ्ट ह्याम्पर समेत उनले पाएका छन्।
अमनप्रताप अधिकारी निर्देशक रहेको 'पोएट आइडल' को यो सिजनमा कवि एवं निर्देशक उपेन्द्र सुब्बा, कवि विप्लव प्रतीक, निर्देशक तथा रंगकर्मी अनुप बराल र अभिनेत्री केकी अधिकारी निर्णायक थिए।
