नेपालमा तेस्रो सातामा प्रदर्शनरत फिल्म 'फर्की फर्की' लाई जापानमा रेड कार्पेटसहित प्रदर्शन गरिएको छ।
आइतबार (जून ९) साँझ राजधानी टोकियोमा आयोजित प्रदर्शनमा अभिनेता अनमोल केसी पनि सहभागी भएका छन्। उनी फिल्मको प्रदर्शनमा सहभागी हुन शनिबार त्यसतर्फ गएका थिए।
टोकियो सहरस्थित नाकानो जिरो हलमा भएको प्रदर्शनमा फिल्म हेर्न जापानबासी नेपालीहरूको उत्साहजनक उपस्थिति रह्यो। अनमोलसँग तस्बिर खिचाउन र उनलाई उपहार दिनेहरूको भीडभाड पनि बाक्लो रहेको थियो।
उक्त प्रदर्शन सोचेजस्तै भएको प्रदर्शक सुवास लामिछानेले बताए। अनमोलले नागोया, ओसाका लगायतका सहरमा हुने शोहरूमा समेत सहभागिता जनाउने जनाइएको छ।
सुयोग गुरूङको लेखन एवं निर्देशन रहेको 'फर्की फर्की' मा अनमोलसहित जसिता गुरूङ, रवी काफ्ले, समृद्धि अर्याल लगायतका कलाकारहरू मुख्य भूमिकामा छन्।
रोहित अधिकारी र ओमप्रकाश अग्रवाल फिल्मका निर्माता हुन्।
