टिकटकबाट चर्चामा आएर म्युजिक भिडिओमा जमिरहेकी मोडल पवित्रा साकी (मिस पबी) कमेडी सिरियलमा जोडिएकी छन्।
प्रसारणको तयारीमा रहेको सिरियल 'ख्याल ठट्टा' मा उनी प्रमुख पात्रका रूपमा देखिने भएकी हुन्।
यसअघि प्रसारणमा आएर रोकिएको यो सिरियललाई नयाँ टिमले दर्शकमाझ ल्याउन लागेको छ। विगत ४ वर्षदेखि नेपाल टेलिभिजनमा 'अति भो' प्रसारणमा ल्याउँदै आएको टिमले उक्त सिरियललाई बन्द गरेर 'ख्याल ठट्टा' दर्शकमाझ ल्याउन लागेको हो।
यसका लेखक एवं निर्देशक सुरज खनालले आउँदो शनिबारदेखि सिरियल प्रसारणमा आउने बताए।
'अति भो' मा निर्मल शर्मा, सुरज खनाल, शर्मिला शर्मा, रेशम फिरिरी, धनराम मुस्कान, इस्टु कार्की, युवराज तिमिल्सिना (राज), सुबि शाही लगायत देखिँदै आएका थिए। यसमा अधिकांश कलाकार सोही सिरियलकै हुनेछन्।
मिस पबीसहित केही कलाकार मात्र थपिएका छन्।
शनिबार बेलुका ७ बजे 'एन स्क्पायर' युट्युबमा सिरियल सार्वजनिक हुनेछ। टेलिभिजनका लागि भने कुराकानी भइरहेको निर्देशक खनालले बताए।
