अभिनेता सौगात मल्लको मुख्य अभिनय रहने फिल्म 'जन्ते बाख्रो' को फर्स्टलुक पोस्टर सार्वजनिक गरिएको छ।
मंगलबार सार्वजनिक थिम पोस्टरमा बाख्रालाई प्रस्तुत गरिएको छ। बाख्रालाई छाता ओढाइएको छ भने आँखामा चस्मा लगाएको देख्न सकिन्छ।
पोस्टरले फिल्म कमेडी कथामा निर्माण हुन लागेको संकेत गर्छ।
प्रदीप भारद्वाजको कथा लेखन रहेको यो फिल्मलाई सिमोस सुनुवारले निर्देशन गर्दैछन्।
निर्देशक सुनुवारका अनुसार ग्रामीण परिवेशको कथामा रहेर फिल्म निर्माण हुनेछ। त्रिकोणात्मक प्रेमकथालाई रोचक तरिकाले देखाउने उनले बताए।
फिल्मका लागि अन्य कलाकारहरू छनौटको चरणमा छन्। मुईन इन्टरटेनमेन्टको ब्यानरमा बन्न लागेको फिल्मको निर्माताका रूपमा सन्तोष गौतम र निर्देशक सिमोस स्वयं छन्।
भदौंदेखि फ्लोरमा जाने फिल्मको सम्पूर्ण छायांकन गाउँमा गरिने जनाइएको छ।
