साउन ११ गतेदेखि प्रदर्शनमा आउने फिल्म 'ईश्वर' को गीत सार्वजनिक गरिएको छ।
सोमबार ओएसआर डिजिटलको युट्युबमार्फत 'आहा भो...' बोलको प्रेमगीत सार्वजनिक गरिएको हो।
कृष्ण काफ्ले र गीता पाण्डेको स्वर रहेको गीतमा भीष्मराज फुलाराको शब्द र अर्जुन पोखरेलको संगीत छ। भिडिओमा फिल्मका कलाकारहरू अभिनेता पृथ्वीराज प्रसाईं र अनु शाह फिचर्ड छन्।
उनीहरूलाई रोमान्टिक भावमा देखाइएको छ। एक अर्काबीचको प्रेमभावलाई गीतमा प्रस्तुत गरिएको छ।
फिल्मका केही दृश्यहरुलाई समेत भिडिओमा समावेश गरिएको छ।
राजु गिरीको निर्देशन रहेको 'ईश्वर' मा पृथ्वीराज र अनुसहित सुनील थापा, ध्रुव थापा, माओत्से गुरूङ, बुद्धि तामाङ, रबिन्द्र झा, कृष्टि गुरूङ, सबिन बास्तोला, शिशिर वाङ्देल लगायत कलाकारको अभिनय छ। पछिल्लो पटक फिल्म ‘पसिना’ मा देखिएकी अभिनेत्री अनु ५ वर्षपछि ‘ईश्वर’ मार्फत कमब्याक गर्न लागेकी हुन्।
दिव्या कंगना फिल्मसको ब्यानरमा निर्माण भएको फिल्मको प्रस्तुतकर्तामा लक्ष्मी कुवँर थापा छिन्। भोजराज देवकोटाको पटकथा लेखन रहेको फिल्ममा हरिबहादुर थापा निर्माताका रूपमा छन्।
फिल्मलाई रामेश्वर हुँमागाईंले छायांकन, बनिश शाहले सम्पादन गरेका हुन्। 'ईश्वर' लाई आरआर फिल्मस्ले वितरण गर्नेछ।
