तीजको अवसर पारेर रिलिज हुन लागेको फिल्म 'रावायण' को नयाँ गीत सार्वजनिक गरिएको छ।
बुधबार ओएसआर डिजिटल युट्युबबाट 'तिम्रै लागि' बोलको रोमान्टिक गीत रिलिज गरिएको हो।
यसको भिडिओमा फिल्मका शीर्ष कलाकार पूजा शर्मा र पल शाह फिचर्ड छन्।
रामजी लामिछानेले भिडिओको कोरियोग्राफी गरेका हुन्।
गीतमा बलिउड गायक कुणाल गाञ्जावाला र सोनु कक्करको स्वर छ। भारतीय संगीतकार नीरज सिंहको संगीत संयोजन रहेको गीतका शब्द कृष्णहरि बरालका हुन्। यो गीतलाई मुम्बईमा रेकर्ड गरिएको हो।
'रावायण' का अन्य गीतमा पनि भारतीय गायकले स्वर दिएका छन्।
सुदर्शन थापाको निर्देशन रहेको यो फिल्म एक्सनप्रधान जनरामा बनेको हो। फिल्ममा पल शाहले दोहोरो भूमिका निर्वाह गरेका छन्। पूजा शर्मा टेलिभिजन सञ्चारकर्मीको भूमिकामा छिन्।
फिल्ममा पल र पूजाका साथमा प्रियंका कार्की, प्रमोद अग्रहरी, प्रकाश शाह, अर्जुनजंग शाही, शर्मीला मल्ल, निकिता चण्डक लगायतको अभिनय छ।
सुदर्शन थापा प्रोडक्सन र पूजा शर्मा प्रोडक्सनको संयुक्त ब्यानरमा फिल्म बनेको हो। यसको निर्माता पूजा शर्मा हुन्। सुशन पाठक कार्यकारी निर्माता छन्।
सुदर्शन थापाको कथा, शिवम अधिकारीको लेखन रहेको फिल्ममा सौरभ लामाको छायांकन, श्री श्रेष्ठको एक्सन, मिलन श्रेष्ठको सम्पादन छ। फिल्म यही भदौ २१ गते रिलिज हुँदैछ।
