टेलिभिजन कमेडी शो 'कमेडी दरबार' को प्रसारण सुरू भएको छ। केही महिना अघिदेखि तयारी थालिएको शोको पहिलो एपिसोड शुक्रबार प्रसारणमा आयो।
यो एपिसोडमा अभिनेता दयाहाङ राई र अभिनेत्री रेखा थापा अतिथिका रूपमा पुगेका थिए।
अब, हरेक राती ९ बजे प्राइम टेलिभिजन र ओएसआर रियालिटी युट्युबमा शो प्रसारणमा आउने निर्देशक बिक्की अगरवालले बताए।
बिक्की र श्रद्धा प्रसाईंको कन्सेप्ट र निर्देशनमा शोको प्रसारण सुरू भएको हो।
शोमा अभिनेत्री गौरी मल्ल, अभिनेता विजय बराल, गायक सिडी विजय अधिकारी, अभिनेत्री नम्रता सापकोटा, मोडल पवित्रा साँकी (मिस पबि), कमेडियनहरू सुन्दर खनाल, हिमेश पन्त, पवन खतिवडा, उत्सव सापकोटा, विकास अर्याल र भिजे सुजिता श्रेष्ठ नियमित देखिनेछन्।
होस्टका रूपमा पूर्व मिस नेपाल नम्रता श्रेष्ठ छिन्। बिक्की भने यो शोमा देखिने छैनन्।
कमेडियन र नन कमेडियनहरूलाई लिएर आइरहेका भन्दा फरक फर्म्याटमा 'कमेडी दरबार' ल्याइएको बिक्कीको भनाइ छ। पहिलो एपिसोडलाई दर्शकले दिएको मायाले उत्साह थपिएको उनले बताए।
पहिलो एपिसोडमा अतिथिका रूपमा आएकी रेखा थापालाई हिमेश पन्तले चुनाव हारेका विषयमा उडाएका थिए। रेखाले पनि हिमेशलाई चोटिलो दनक दिँदै उडाएकी थिइन्।
