छायांकनको तयारीमा रहेको फिल्म 'होस्टेल ३' मा अभिनेता आर्यन सिग्देल र अभिनेत्री परीक्षा लिम्बु अनुबन्धित भएका छन्। उनीहरू र निर्माण पक्षबीच कागजी सम्झौता भइसकेको छ।
आर्यन फिल्ममा 'वार्डेन' को भूमिकामा देखिनेछन्। निर्देशक सशान कँडेलले भने, 'उहाँले निभाउने वार्डेनको भूमिका फिल्मको मेरूदण्ड हो। यसअघि पनि होस्टेल शृङखलामा वार्डेनको भूमिका चर्चित थियो, तर यस पटकको भूमिका अझै बलियो छ।'
उनका अनुसार फिल्ममा परीक्षाको पनि विशेष भूमिकामा अभिनय रहनेछ। आर्यन र परीक्षाले यसअघि फिल्म 'पुजार सार्की' मा सँगै काम गरेका थिए।
फिल्मको जापान, मध्यपूर्व र मलेसियाका लागि वितरण अधिकार बिक्री भइसकेको निर्माण टीमले जनाएको छ।
यो फिल्ममा यसअघि 'कुल ब्वाय' अर्थात् पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ लगायतका कलाकारहरू अनुबन्धित भइसकेका छन्।
'होस्टेल ३' को स्क्रिप्ट माधव शर्माले लेखेका हुन् भने कथा निर्देशक कँडेलकै हो। यसलाई सम्मान इन्टरटेन्मेन्टले आरोन कन फिल्म्ससँगको सहकार्यमा निर्माण गर्दै छ। कार्यकारी निर्माता शंकर कोइराला, निर्माता कर्ण कार्की र गोविन्द अधिकारी हुन्। सह–निर्माताहरूमा सुधा मरहट्ठा, सुरेश कँडेल र अर्जुन सापकोटा छन्।
फिल्मलाई आगामी फागुन १६ गते विश्वभर एकसाथ रिलिज गरिने जनाइएको छ।
