फिल्म 'तेल भिसा' को गीत 'तुकुनको मुकुन मन पर्या' सार्वजनिक गरिएको छ।
बिहीबार युट्युबमा सार्वजनिक गीतमा फिल्मका शीर्ष कलाकार विपिन कार्की र पूजा चन्दसहित बुद्धि तामाङ, जाहन्वी बस्नेत लगायतका कलाकारहरू फिचर्ड छन्। भिडिओका कोरियोग्राफर रामजी लामिछाने हुन्।
गीतमा स्वर शान्तिश्री परियार र साइराज खातीको छ। कृष्ण भारद्धाजको संगीत, राजन इशानको एरेञ्ज रहेको गीतमा निर्विकल्पम, कृष्ण भारद्धाज, शंकर अधिकारी घायल र नवीन बिकको शब्द रचना छ।
शंकर घिमिरेको लेखन तथा निर्देशनमा निर्माण भएको फिल्म 'तेल भिसा' मा विपिन कार्कीले बृद्ध र जवान गरी दोहोरो भूमिका निर्वाह गरेका छन्। विपिन, पूजा र बुद्धिसँगै वर्षा राउत, ऋचा घिमिरे, सुचित्रा उप्रेती र विदेशी कलाकारहरूको समेत अभिनय छ।
वेलडन क्रियसनको ब्यानरमा ऋचा घिमिरेको प्रस्तुति रहेको फिल्ममा अनिल पाण्डे र शिवराज कार्कीको लगानी छ। प्रिन्स युवराज कार्की र श्रुती दाहाल कार्यकारी निर्माता छन्। सुशन प्रजापतिको छायांकन, रामजी लामिछाने र शिशिर खातीको कोरियोग्राफी रहेको फिल्मलाई अजय खड्काले सम्पादन गर्नेछन्।
फिल्म मंसिर ७ गते रिलिज हुने तयारीमा छ।
