शुक्रबारदेखि उत्साहजनक शोका साथ प्रदर्शनमा आएको फिल्म 'होस्टेल-३' मा दर्शक उपस्थिति सुखद् देखिएको छ।
शनिबार हलमा बिहानैदेखिका शोमा अकुपेन्सी उत्साहजनक छ। कतिपय शो हाउसफुल भएका छन्। फिल्मको बुकिङ पनि सुखद् देखिन्छ।
बिहानैदेखि धेरै हलहरूमा शतप्रतिशत र केहीमा ८० देखि ९० प्रतिशतसम्म अकुपेन्सी रहेको काठमाडौं उपत्यकाका वितरक गोविन्द शाहीले बताए।
त्यस्तै, काठमाडौं उपत्यका बाहिरका वितरक रोहित कट्टेलले फिल्मले अपेक्षाभन्दा राम्रो गरिरहेको बताए।
यसैबीच, फिल्मका कलाकारहरू शनिबार बिहानैदेखि काठमाडौंका हलहरूमा दर्शक भेट्न पुगिरहेका छन्।
कलाकारहरू कीर्तिपुरस्थित कीर्तिपुर सिनेप्लेक्स, कमलपोखरीस्थित बिग मुभिज पुग्दा दर्शकले पनि खुसीले हुटिङ गरेका थिए। साथै, कलाकारसँग सेल्फी लिनेको भिड देखिएको थियो।
फिल्मले दर्शकबाट प्रतिक्रिया पनि राम्रो पाइरहेको छ। हलहरूमा कलाकारहरू पारस बम ठकुरी (कुल ब्वाइ), सिम्रन पन्त, पदम तामाङ, आशिष घिमिरे, हेना नगरकोटी, सन्तोष बानियाँ, समा पराजुली, विलियम पिएनसहित निर्देशक सशान कँडेल पनि पुगिरहेका छन्। उनीहरूले दर्शकसँग प्रतिक्रिया लिँदै फोटो र भिडिओ खिचाइरहेका छन्।
निर्देशक सशान कँडेलले आफ्नो पहिलो निर्देशनमा नै दर्शकबाट माया पाएकोमा खुसी व्यक्त गरे।
उनले भने, 'व्यापार त महत्वपूर्ण छ। तर त्योभन्दा पनि महत्वपूर्ण कुरा दर्शकहरूले फिल्मलाई कसरी आत्मसाथ गर्छन् भन्ने हो। यसले दर्शकलाई भरपुर मनोरञ्जन दिन सफल भएको छ। यो सफलता मेरो मात्र नभएर सम्पूर्ण टिमको मेहनतको परिणाम हो भन्ने मान्छु।'
'होस्टेल-३' मा अधिकांश कलाकारहरू फिल्मका लागि नयाँ भए पनि सोसल मिडियामा चिनिएका छन्।
होस्टेलमा बसेर अध्ययन गरिरहेका टिनएजरहरूको कथामा फिल्म बनेको हो। फिल्मको कथा माधव शर्माले लेखेका हुन्। निर्माता सुरेश कँडेल, कर्ण कार्की, गोविन्द अधिकारी हुन्। कार्यकारी निर्माताका रूपमा शंकर कोइराला छन्।
होस्टेलका यसअघिका शृंखला सुपरहिट भएका थिए। 'होस्टेल' र 'होस्टेल रिटर्न्स' पनि त्यसबेला नयाँ कलाकारहरू लिएर बनाइएको थियो।
