फिल्ममा हुने 'सेन्सरसिप' बारे प्रतिनिधिसभा बैठकमा पनि कुरा उठेको छ।
आइतबार बसेको बैठकको शून्य समयमा बोल्दै राष्ट्रिय स्वतन्त्र पार्टी (रास्वपा)का सांसद असिम शाहले फिल्म सेन्सरसिपबारे कुरा उठाएका हुन्।
गत शुक्रबार रिलिज फिल्म 'राजागंज' को सन्दर्भ जोड्दै उनले केन्द्रीय चलचित्र जाँच समितिमा कला बुझेको मान्छेलाई नियुक्त गर्न आग्रह गरे।
फिल्म रिलिजको मुखमा अनावश्यक काँटछाँट गर्ने प्रवृत्ति अहिले सेन्सर बोर्डमा देखिएकोप्रति उनले विरोध गरे।
'फिल्म समाजको ऐना हो। त्यही समाजका कुरा फिल्ममार्फत व्यक्त गर्दा सरकारले अभिव्यक्ति स्वतन्त्रतामा अंकुश लगाउने काम गरिरहेको छ,' शाहले भने, 'सेन्सर बोर्डमा राजनीतिक नियुक्ति पाएका सबै ‘ननसेन्सर’ सदस्यलाई पदमुक्त गरी फिल्म कला बुझेका मान्छेलाई नियुक्त गर्न म सरकारसँग माग गर्दछु।'
फिल्मकर्मीहरूको सेन्सरसिपविरूद्धको आन्दोलनमा आफूले ऐक्यबद्धता जनाउने समेत उनले बताए।
पछिल्लो समय सेन्सरसिपको चपेटामा दीपक रौनियार निर्देशित फिल्म 'राजागंज' परेको छ।
फिल्ममा प्रधानमन्त्री केपी शर्मा ओलीले २०७२ सालमा गरेको भाषणको अंश समावेश थियो। त्यसमा सेन्सर बोर्डले अंकुश लगाएपछि फिल्मकर्मी थप आक्रोशित बनेका छन्।
यो पनिः फिल्मकर्मी भन्छन्- सेन्सर बोर्ड खारेज गर्नुपर्छ
