एक दशकभन्दा लामो समयदेखि फिल्म निर्देशनमा सक्रिय निर्देशक हुन् ऋषिराज आचार्य।
उनी निर्देशित 'मिस्टेक', 'सपना तिम्रो मेरो', 'सुन्तलीलाई भगाइ लग्यो झिल्केले', 'ड्रिम गर्ल' र 'चुरीफुरी' दर्शकमाझ आइसकेका छन्।
यीमध्ये 'मिस्टेक' र 'सपना तिम्रो मेरो' उनले प्रेमकथामा बनाएका थिए। 'सुन्तलीलाई भगाइ लग्यो झिल्केले' मा जारी प्रथाको कथा देखाए। फेरि प्रेमकथामा फर्किँदै 'ड्रिम गर्ल' निर्देशन गरे। कमेडी जनरामा 'चुरीफुरी' बनाए।
यतिबेला उनको आगामी फिल्म 'द्रौपदी' प्रदर्शनको तयारीमा छ। यो फिल्म मौलिक कथावस्तुमा रहेर बनाएको उनको भनाइ छ।
'द्रौपदी' हिन्दू धर्मको प्रमुख धर्म ग्रन्थ महाभारतकी मुख्य पात्र हुन्। निर्देशक आचार्यका अनुसार फिल्ममा पनि नारी पात्रलाई केन्द्रमा राखिएको छ।
कर्णालीको जनजीवन र त्यहाँको सुन्दरतालाई फिल्मले चित्रण गर्छ। निर्देशक आचार्य फिल्मबारे धेरै खुलाउन भने चाहँदैनन्। भन्छन्, 'द्रौपदी नाम जति ओजिलो छ। यसको विषय पनि त्यतिकै बलियो छ। त्यत्तिकै वजनदार छ।'
उनका अनुसार यो फिल्मका लागि पाँच वर्ष अघिदेखिको तयारी थियो।
उनले भने, 'ड्रिम गर्ल बनाउँदै गर्दा यो फिल्म घोषणा गरेको थिएँ। एकदमै अर्ग्यानिक विषयमा काम गर्छु भन्ने थियो। सोहीकारण स्क्रिप्ट लेख्नमै ४ वर्ष लगाएँ।'
नेपालमा बस्नेहरूका लागि मात्र नभइ विदेशमा रहेका नेपालीहरूलाई पनि लक्षित गरेर फिल्म बनाएको आचार्यले बताए।
उनले भने, 'विदेशमा बस्ने नेपालीहरूलाई देशप्रतिको माया, यहाँको कलासंस्कृति, देशप्रतिको मोह अझ जागोस् भन्ने हिसाबले राष्ट्रिय/अन्तर्राष्ट्रिय स्तरसम्म पुर्याउँछु भन्ने सोच छ।'
गहन विषयमा फिल्म बनाएको बताउँदै दर्शकमा गहिरो छाप छाड्ने विश्वास समेत उनले लिएका छन्।
ऋषिराज आचार्य अभिनेता समेत हुन्। घर दाङबाट काठमाडौं आउँदै गर्दा उनको सपना 'हिरो बन्छु' भन्ने थियो।
उनले टेलिफिल्मबाट अभिनेताका रूपमा चर्चा समेत पाएका थिए। 'आफन्त' लगायतका टेलिफिल्ममा उनको अभिनय रूचाइएको थियो।
उनले निर्देशक शम्भु प्रधानसँग पाँच वर्ष मुख्य सहायक निर्देशक भएर समेत निर्देशनको अनुभव लिएका थिए।
यसअघि आफू निर्देशित फिल्ममा उनले शीर्षमध्येको भूमिकामा अभिनय गरेका थिएनन्।
यसपटक 'द्रौपदी' मा उनले अभिनय समेत गरे। यसलाई उनी आफ्नो अभिनयमा कमब्याक भन्छन्। त्यसबारे उनी भन्छन्, 'यसको कन्टेन्टले असाध्यै छोयो। कुनै पात्रमा आफै खेल्छु भन्ने थियो। एउटा यस्तो पात्र जन्मियो, त्यो पात्रमा मैले अभिनय देखाउन सक्छु भन्ने लागेपछि आफै देखिएँ।'
आफू कलाकार पनि भएकाले त्यसलाई दबाइराख्नु हुँदैन भन्ने लागेपछि यसमा अभिनय समेत गरेको उनले बताए।
यो फिल्ममा धेरै नयाँ अनुहारहरू छन्। नेपाल आइडल विजेता रवी ओडले 'द्रौपदी' बाट फिल्ममा डेब्यु गरेका छन्। आश्विनी शाही, सुजाता तिमल्सिनाको पनि यो डेब्यु फिल्म हो। साथमा, जेल्सन अधिकारी, कबिराज भाम, विष्णु ठडराई, प्रकाश ज्ञवाली, सुरज अधिकारी, सीता बौडेल लगायतको समेत अभिनय छ।
निर्देशक तथा अभिनेता आचार्यले कलाकार नयाँ भए पनि कथाअनुसार सुहाउने लिइएको बताए।
'शीर्ष भूमिकामा देखिनुभएका धेरैजसो नयाँ हुनुहुन्छ। यद्यपि, कतिपय यसअघि चिनिइसकेको कलाकार हुनुहुन्छ। यसमा एकदमै चिनिएको कलाकार राख्दा अलि सुहाउँदैनथ्यो कि? किनकि हामीले यस्तो कथा उठान गरेका छौं, जसमा फिल्ममा देखिइरहेको फेस आयो भने वास्तविक नलाग्न सक्थ्यो। कलाकारहरू नायँ भए पनि काम हेर्दा नयाँ जस्तो लाग्दैन।'
उनी फिल्म चल्नका लागि कलाकार मात्र भएर नहुने बताउँछन्। उनको बुझाइमा 'कन्टेन्ट' नै फिल्मको मुटु हो।
'प्रमुख कुरा कन्टेन्ट हो। यसमा कन्टेन्ट बलियो छ,' उनले भने, 'गहिराइमा अध्ययन गरेर लामो समय लगाएर यो फिल्म बनाएको छु। यसलाई नेपाली हलमा मात्रै सीमित राख्ने योजना छैन। राम्रो फिल्म बनाएपछि ल्याण्डिङ राम्रोसँग गर्न जरूरी छ। नेपालसँगै विदेश प्रदर्शनको तयारी छ। विभिन्न फेस्टिभलमा समेत पठाउनेछौं।'
फिल्म यही शुक्रबारदेखि प्रदर्शनमा आउँदैछ।
