फिल्म 'शिवांशः च्याप्टर १' को छायांकन ३६ दिनमा सकिएको छ। जेठको पहिलो सातादेखि सुरू भएको छायांकन ३६ औं दिनमा पूरा भएको हो।
पोखरा आसपासमा छायांकन गरिएको 'शिवांश: च्याप्टर१' को गीतसमेतको दृश्य खिचिएपछि छायांकन पूर्णरूपमा सकिएको निर्माता अञ्जान केसीले बताए।
उनले भने, 'हामीले पोखराको पामेमा सिनेमाकै एउटा गीत खिचेसँगै छायांकन सम्पन्न गर्यौं। अब पोस्ट–प्रोडक्सनको कामलाई तीव्रता दिनेछौं।'
अञ्जान सिनेमा प्रोडक्सन हाउसको प्रस्तुति रहेको फिल्मको निर्देशक सन्तोष कुमार आत्रेय हुन्। फिल्ममा प्रवीण खतिवडा, तेज गिरी र रूषा न्यौपाने मुख्य भूमिकामा छन्। साथमा विकास जोशी, विमला लिम्बू, प्रदीप कुमार चौधरी, सबिर चुरौटे, उदय कुमार सुब्बा, टिका निरौलालगायत कलाकारहरूको पनि अभिनय छ।
फिल्मको कथा निर्माता अञ्जान केसी स्वयंले लेखेका हुन्। स्क्रिनप्ले बारत लिम्बूको छ। यसको सह–निर्मातामा शोभा भण्डारी र अनिस केसी बोगटी रहेका छन् भने कार्यकारी निर्माता शम्भु थापा हुन्।
-1746009348.jpg)
