वैज्ञानिक कल्पनामा आधारित नेपाली फिल्म 'एक्लो' को सम्पूर्ण छायांकन सकिएको छ।
निर्देशक प्रदीप शाहीका अनुसार फिल्मको बाँकी रहेको एउटा गीत खिचेसँगै सम्पूर्ण छायांकन पूरा भएको हो।
हालसालै काठमाडौंमा सेट लगाएर खिचिएको गीतमा अभिनेत्री कविता नेपाली फिचर्ड छिन्। स्वप्निल शर्माको स्वर रहेको गीतमा रोहित शाक्यको संगीत छ। कोरियोग्राफी कविता नेपाली स्वयंले गरेकी हुन्। यो गीत दसैंमा रिलिज गरिने कार्यकारी निर्माता विनोद सुवेदी 'क्षितिज' ले जानकारी दिए।
'एक्लो' नेपाली फिल्म क्षेत्रमा दुर्लभ मानिने वैज्ञानिक कथामा आधारित फिल्म हो। यसमा अभिनेता प्रदीप खड्का मुख्य भूमिकामा छन्। फिल्मको पोस्ट–प्रोडक्सन लन्डनमा भइरहेको छ भने फिल्म आउँदो पुषमा क्रिसमसको अवसर पारेर रिलिज गर्ने तयारी गरिएको छ।
फिल्ममा प्रदीप खड्का र कवितासहित विजय लामा, दीया पुन, जेमी बेकन, बेनिशा हमाल, सुनील थापा, दिनेश डिसी, सुरजसिंह ठकुरी, एवनराज उप्रेतीलगायत कलाकारहरूको अभिनय छ।
लामो समयदेखि बेलायतमा बसोबास गर्दै आएका निर्देशक शाहीले 'एक्लो' मा हलिउड स्तरको प्रविधि र प्रस्तुति दिने लक्ष्य राखेका छन्।
फिल्मको निर्माण टिममा राजकुमार गुरूङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन, भुवन अधिकारी, संगीता वादी श्रेष्ठ, रितेश राना, सुशील प्रजापति र शशिकला गुरूङ छन्।
फिल्म बाबु श्रेष्ठले छायांकन गरेका हुन्।
-1746009348.jpg)
