'मनोरञ्जन भनेको हाँस्नु मात्र होइन, फिल्मसँग बाँधिनु पनि हो'

पारिवारिक कथामा बनेको 'हर्ष', यसो भन्छन् कलाकार र अमेरिका पढेकी निर्देशक

सेतोपाटी कला

काठमाडौं, मंसिर ४

निर्देशक एकता पौडेलले आफूले फिल्म पढ्दा सिकेको ज्ञान र अनुभवले 'हर्ष' बनाएको बताएकी छिन्।

अमेरिकाबाट फिल्म निर्माणसम्बन्धी अध्ययन गरेर फर्किएकी उनको पहिलो निर्देशकीय फिल्म 'हर्ष' यही मंसिर १२ गतेदेखि प्रदर्शनमा आउँदैछ।

बिहीबार काठमाडौंमा आयोजित पत्रकार सम्मेलनमा निर्देशक पौडेल, अभिनेता खगेन्द्र लामिछाने र अभिनेत्री वर्षा राउतले फिल्मबारे कुरा राखे।

त्यसक्रममा एकताले फिल्म निर्माणको पढाइले काममा निखार ल्याएको बताइन्। फिल्मबारे ज्ञानदेखि नेतृत्व क्षमता आफूलाई फिल्म अध्ययनले दिएको उनको भनाइ छ।

उनले फिल्मको विषय एकदमै नौलो नभएको बताइन्।

उनले कथाबारे भनिन्, 'यो हामीले समाजमा देखिरहेको, हाम्रो संस्कृति, हाम्रो मानसिकता र हाम्रो मूल (जरा) को कथा हो। हामी जति नै आधुनिक भए पनि आफ्नो वंश र पुस्तासँग जोडिएका हुन्छौं। त्यसैलाई मैले मेरो दृष्टिकोणबाट पेस गर्ने कोसिस गरेकी छु।'

स्वर्गीय निर्देशक शिव रेग्मीकी भाञ्जी समेत रहेकी एकताले आफू मामा र तुलसी घिमिरेका पारिवारिक फिल्म हेरेर हुर्किएको बताइन्। आफूसँग विभिन्न विधाका ५–७ वटा कथा भए पनि ‘पारिवारिक ड्रामा’ आफ्नो मनपर्ने विधा भएकाले पहिलो फिल्म यसैबाट सुरू गरेको बताइन्।

फिल्मको व्यावसायिक पाटोभन्दा पनि दर्शकको प्रतिक्रिया आफ्नो प्राथमिकतामा रहेको उनले बताइन्।

'मेरो पहिलो प्राथमिकता भनेको फिल्म हेरेपछि दर्शकले 'राम्रो चलचित्र बनाएछ, कथा भन्ने शैली राम्रो रहेछ' भनिदिऊन् भन्ने हो,' उनले थपिन्, 'व्यवसायको कुरा त कसैले भन्न सक्दैन, तर सबैको मन छुन सक्छु भन्ने विश्वास छ। मलाई पहिलो पटक फिल्म बनाउँदा सरल पनि होस् र पारिवारिक महसुस पनि गराओस् भन्ने लागेर यो विधा रोजेकी हुँ।'

अभिनेता खगेन्द्र लामिछानेले मनोरञ्जनको परिभाषा हाँस्नु मात्र नभएको बताए।

'मनोरञ्जन भनेको दर्शक फिल्मसँग बाँधिनु पनि हो, हाँस्नु मात्र होइन,' खगेन्द्रले भने, 'यो एउटा परिवारको मात्रै कथा हो। वंश धान्ने मान्छे नहुँदाको अवस्थालाई अघिल्लो पुस्ता र नयाँ पुस्ताले हेर्ने दृष्टिकोणको अन्तरलाई यसमा रोचक तरिकाले देखाइएको छ।'

उनले फिल्मले दर्शकलाई मनोरञ्जन दिनुका साथै परिवारमा हरेक सदस्यको महत्व बुझाउने विश्वास व्यक्त गरे। कहिलेकाहीँ सामान्य कथामा काम गर्दा पनि आनन्द आउने उनको अनुभव छ।

त्यस्तै, अभिनेत्री वर्षा राउतले कथा र चरित्रलाई न्याय गर्न सक्छु भन्ने लागेर नै फिल्ममा काम गरेको बताइन्। मुख्य भूमिकामा देखिन लागेकी वर्षाले दर्शकले आफ्नो काममा सुधार देख्ने अपेक्षा राखेकी छन्।

'पर्दामा देखिने समय (स्क्रिन टाइम) धेरै पाएकी छु, दर्शकले मेरो काममा सुधार भएको महसुस गर्नुहुनेछ भन्ने लाग्छ,' वर्षाले भनिन्। फिल्मको भावबारे बोल्दै उनले थपिन्, 'अहिले नेपाली फिल्मले राम्रो गरिरहेका छन्, धेरै फिल्मले दर्शकलाई रूवाएका पनि छन्। तर, हाम्रो फिल्मले दर्शकहरूलाई हर्षित बनाएर रूवाउँछ जस्तो लाग्छ।'