अर्जुन घिमिरे (पाँडे)को निर्देशनको बनेको फिल्म 'झरीपछिको इन्द्रेणी' को गीत काठमाडौं महानगरका मेयर बालेन शाहको आधिकारिक युट्युब च्यानलबाट सार्वजनिक गरियो।
गत शनिबार बिहान सार्वजनिक लोक लयको गीत 'फसायो लमीले' ले अपेक्षित चर्चा भने बटुल्न सकेको देखिँदैन।
करिब ८ लाखभन्दा बढी सब्स्क्राइबर भएको र युवा पुस्तामाझ अत्यधिक क्रेज भएका 'बालेन' ब्रान्डको च्यानलबाट गीत रिलिज हुँदा चर्चा पाउने अपेक्षा निर्माण पक्षको थियो। तर सार्वजनिक भएको ४ दिन बितिसक्दा पनि (बुधबार दिउँसोसम्म) गीतको भ्युज २ लाख ५० हजार पनि पुग्न नसक्नु अपेक्षित होइन्।
उसो त यसअघि गत वर्ष 'लाज शरणम्' फिल्मको गीत 'नेपाल हाँसेको' बालेनकै युट्युबमा सार्वजनिक थियो। बालेनकै स्वर रहेको उक्त गीतले रिलिजको दिनबाटै लोभलाग्दो चर्चा पाएको थियो। यसपालि सार्वजनिक गीतमा भने समीक्षा अधिकारी र बसन्त थापाको स्वर छ। गीतमा बालेन आबद्ध नभए पनि रिलिजका लागि मात्र उनको युट्युब च्यानल प्रयोग गरिएको हो।
उसो त कतिपय गीतहरू अलि पछि चलेका उदाहरण समेत प्रसस्तै छन्। तर, बालेनको हाइपअनुसार प्रारम्भिक दिनमा गीतले किन चर्चा पाउन सकेन? त्यो फिल्मवृत्तका लागि चर्चाको विषय हुनसक्छ।
बालेनको युट्युब च्यानलका अधिकांश सब्स्क्राइबरहरू उनको र्याप गीत, हिप-हप विधा वा समसामयिक राजनीतिक गतिविधिका कारण जोडिएका हुनसक्छन्। तर, 'फसायो लमीले' विशुद्ध लोकलयमा आधारित गीत हो।
र्याप सुन्न वा बालेनको अन्तर्वार्ता हेर्न सब्स्क्राइब गरेका दर्शकले लोक गीतलाई बेवास्ता गरेको पनि हुनसक्छ।
बालेनको च्यानलमा यसअघि यस्तो प्रकारको व्यावसायिक मसलादार लोक गीत नआएकाले पनि दर्शकले धेरै चासो नदिएको हुनसक्छ। युट्युबको अल्गोरिदमले पनि प्रायः एकै प्रकारका सामाग्री रूचाउने दर्शकलाई भिडिओ सुझाव गर्ने जानकारहरू बताउँछन्।
'फसायो लमीले' को सन्दर्भमा 'ब्रान्ड भ्यालु' हेरेर प्लेटफर्म रोज्दा 'कन्टेन्ट' र 'प्लेटफर्म' बीचको तालमेल नमिलेको हुनसक्ने आँकलन धेरैको छ।
त्यसमाथि बजारमा दिनहुँ आउने दर्जनौं लोक दोहोरी र फिल्मका गीतहरूको भिडमा यसले 'युनिकनेस' दिन नसकेको पनि हुनसक्छ। टिकटक वा रिल्समा जसरी भाइरल हुनुपर्ने थियो, त्यो हुन नसक्दा युट्युब भ्युज राम्रो पाउन नसकेको आँकलन समेत गरिएको छ।
कतिपय गीतहरू सुरूमा सुस्त देखिए पनि बिस्तारै चर्चामा आएका उदाहरण प्रशस्त छन्। 'फसायो लमीले' को लय सरल र नाच्न मिल्ने खालको छ। त्यसकारण, बिस्तारै टिकटक वा सामाजिक सञ्जालमार्फत यसले गति लिन सक्ने सम्भावना भने टरिसकेको छैन।
'झरीपछिको इन्द्रेणी' मा गणेश उप्रेती, रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, अर्जुन घिमिरे, प्रियाना आचार्य, अंशु महर्जन, राम बाबु रेग्मीलगायत कलाकारहरूको अभिनय छ। निर्माता अनिशा सेन्दाङ लिम्बु हुन् भने अनु थापा, पंकज खड्का, राम कार्की र सुवास शर्मा सह–निर्माता छन्।
निर्देशक घिमिरेसहित गणेश कार्की र विशाल घिमिरेको पटकथा र संवाद यसमा छ। निर्माण घोषणादेखि चर्चामा रहेको 'झरीपछिको इन्द्रेणी' पुस ४ गते रिलिज हुनेछ।
यस्तो छ 'फसायो लमीले' गीत
-1746009348.jpg)
