लोकगायिका विष्णु माझी मात्रै होइन्, उनको गीतमा नृत्य गर्ने मोडल ललिता पौडेल पनि गुपचुप र संचारमाध्यमबाट टाढा देखिएकी छन्।
केही वर्ष पहिलेसम्म अन्य कलाकारहरूको गीतमा पनि देखिने उनी पछिल्ला वर्ष विष्णु माझीका गीतमा मात्रै देखिने गरेकी हुन्।
विष्णु माझीको चार वर्षअघिको गीत 'चरी जेलैमा' बाट ललिता धेरैको नजरमा परेकी थिइन्। तर त्यसपछि उनी अन्य भिडिओमा नदेखिएर विष्णु माझीको गीतमा मात्रै देखिइन्।
विष्णुको 'चरी जेलैमा २' मा पनि उनले अभिनय गरिन् भने गत वर्षको 'आइनँ आमा यो तीजमा' मा पनि ललिताको नृत्यलाई दर्शकहरूले रूचाए।
तीजपछि विष्णुको गत वर्षको दसैं गीत 'परदेशी मेरो परदेशी' मा पनि ललिताले अभिनय गरिन्। त्यसयता अन्य गीतको भिडिओमा नदेखिएकी उनी फेरि विष्णु माझीको यस वर्षको तीज गीतमार्फत दर्शकमाझ आउँदैछिन्।
विष्णुको यो वर्षको तीज गीत सम्पादन सकिएर रिलिजका लागि अन्तिम तयारीमा छ।
उसो त ललिता गायिका समेत हुन्। युट्युबमा हेर्ने हो भने उनले गाएका र अभिनय गरेका अन्य म्युजिक भिडिओहरू समेत भेटिन्छन्।
केही वर्ष अघिसम्म उनले अरूका गीत गाउनुका साथै अरूका म्युजिक भिडिओमा अभिनय समेत गरेकी थिइन्। तर पछिल्ला वर्ष उनी विष्णुका भन्दा अरू गीतमा नदेखिएकी हुन्।
केही वर्षयता यसअघि सहकार्य गरेका कलाकारहरुसँग पनि उनी नजिक नरहेको बताइन्छ। संचारमाध्यममा पनि उनीबारे खास्सै जानकारी भेटिँदैन भने ललिता सोसल मिडियामा समेत सक्रिय नरहेको निकटस्थहरू बताउँछन्।
उनले विष्णुको गीतमा मात्रै अभिनय गर्नुलाई लिएर फ्यान तथा शुभचिन्तकहरूमा जिज्ञासा देखिन्छ।
-1746009348.jpg)
