गायक तथा संगीतकार शिव परियारको नयाँ गीति एल्बम सार्वजनिक भएको छ।
शुक्रबार काठमाडौंमा एक कार्यक्रम आयोजना गर्दै गीति एल्बम 'तिमी र म' विमोचन गरिएको हो। नेपाल स्रस्टा समाजका अध्यक्ष ओम श्रेष्ठ (रोदन), धीरकुमार श्रेष्ठ, गीतका गायक शिव परियार, गीतकार सागर फुयाल, अभिनेत्री मिरुना मगर, अभिनेता अनुपविक्रम शाहीले संयुक्त रूपमा गीति एल्बम विमोचन गरेका हुन्।
सागर फुयालको एकल शब्द संग्रहित एल्बममा परियारको स्वर संगीत छ। यस एल्बममा ६ वटा गीतहरू समावेश छन्। 'तिमी हौं सबथोक मेरो, तिमी र म अनि शीतल धुन, मेरो ज्यान भन्छ्यौ भने, हाम्रो माया एक नदीको दुई किनार, जिउन मन छैन अधर तिम्रो नहेरी र तिमी फूल हौं सुगन्ध छर्नु पर्छ तिमीले' बोलको गीत समावेश छ।
कार्यक्रममा उक्त सांगीतिक संग्रहमा समावेश गरिएको 'तिमी हौं सबथोक मेरो' बोलको गीतको भिडिओ सार्वजनिक गरिएको छ। निकेश खड्काले निर्देशन गरेको म्युजिक भिडिओमा अभिनेता अनुपविक्रम शाही र मिरुना मगरलाई देख्न सकिन्छ।
हरि हुमागाईंले छायांकन गरेको गीतलाई विकाश धमलाले सम्पादन गरेका छन्।
