द भ्वाइस अफ नेपाल सिजन-४ का विजेता करण राईले नयाँ गीत सार्वजनिक गरेका छन्।
काठमाडौंमा एक कार्यक्रम गर्दै 'पिरतीको मुस्कान' बोलको गीत सार्वजनिक गरिएको हो। गीतको भिडिओमा गायक राईसँग अभिनेत्री मिरूना मगर फिचर्ड छिन्।
लीला सेलिङ माबोको शब्द रहेको गीतमा देवेश राईको संगीत, संगीत संयोजन तथा मिक्सिङ छ। लिला र अन्जु सेलिङले निर्माण गरेको गीत करण राई युट्युब च्यानलमार्फत सार्वजनिक गरिएको हो।
शान थापाले निर्देशन गरेको म्युजिक भिडिओलाई रोशन विश्वकर्माले कोरियोग्राफी गरेका छन्। अर्जुन तिवारीले छायांकन गरेको म्युजिक भिडिओलाई सुप्रिम पराजुलीले सम्पादन गरेका हुन्।
गायक करणले आफ्नै गीतमा पहिलो पटक नृत्य गर्दा राम्रो अनुभव रहेको बताए।
'कलाकारीता क्षेत्रमा छु। जे छु जस्तो छु, यसलाई नै निरन्तरता दिन्छु भन्ने विश्वास छ। थोरै पैसा कमाउ तर यहि क्षेत्रमा केही गर्छु र यहि क्षेत्रकै लागि म जन्मिएको हुँ,' उनले कार्यक्रममा भने।
