अभिनेता मुकुन भुषाल र मेनुका प्रधान अभिनीत फिल्म 'गणपति' को गीत सार्वजनिक भएको छ।
सोमबार ओएसआर डिजिटल युट्युब च्यानलमार्फत फिल्ममा समावेश 'उनभित्र गुण' बोलको गीत सार्वजनिक गरिएको हो। शंकर अधिकारी 'घायल' को शब्द रहेको गीतमा बाबुल गिरीको स्वर, संगीत तथा संगीत संयोजन छ। गीतको भिडिओमा फिल्मका केही दृश्य समावेश गरिएको छ।
सबिन अधिकारीले निर्देशन गरेको फिल्ममा मुकुन र मेनुकासँगै कविता न्यौपाने, सूर्यमाला खनाल, जयनन्द लामा, प्रकाश घिमिरे, राजाराम पौडेल, पुष्कर गुरुङ, अंशु मानन्धर, कालु राना, टीका भक्त जिरेल, सुशील पोखरेल, देवेन्द्र बब्लुलगायत कलाकारको अभिनय छ।
यो फिल्मको सम्पूर्ण छायांकन तनहुँको बन्दीपुर गाउँपालिका थारुवासमा गरिएको हो। एबिगम्यान फिल्म्स ब्यानरको फिल्ममा लक्ष्मण थापाको लगानी छ। फिल्मलाई हरिबहादुर घलेले छायांकन गरेका हुन्।
यो फिल्म भदौ १४ गतेदेखि प्रदर्शन हुँदैछ।
