कुमार भाष्करको निर्देशनमा बनेको फिल्म 'कौसीद' को गीत सार्वजनिक भएको छ।
बुधबार ओएसआर डिजिटल युट्युब च्यानलमार्फत फिल्ममा समावेश 'नझर्थेर आँशु' बोलको मार्मिक गीत सार्वजनिक गरिएको हो। गीतले सुख र दुःखले मिश्रित दैनिकीको भाव बोल्छ। आफ्नो पीडा भुलेर अरूको खुसीको लागि संघर्षरत एक शिक्षकको कथा शब्दमा व्यक्त छन्।
बुद्ध लामाको स्वर तथा संगीत रहेको गीतमा लक्ष्मण बानियाँको शब्द छ। मिक्सिङ तथा मास्टरिङ राहुल प्रधानको छ।
फिल्ममा ऋचा शर्मा, भोलाराज सापकोटा, रूपेश दाहाल, परिक्षित विक्रम राणा, सदिक्षा गौतम, निर्भिक भट्टराई, सन्दीप लोहनीलगायत कलाकारको अभिनय छ। केदार भुसालको निर्माणमा तयार भएको फिल्मको कार्यकारी निर्माता दिमेश श्रेष्ठ र सह-निर्माता लक्ष्मण बानियाँ हुन्।
यो फिल्मको कथा लेखन नवविजय प्रकाश श्रेष्ठ र धिर्जन थपलियाले गरेका छन्। निसाल पौडेलले छायांकन गरेको फिल्ममा भिम विश्वकर्माको सम्पादन छ। बड पिक्चर्सको ब्यानरमा तयार भएको फिल्मलाई आरआर फिल्म्सले वितरण अधिकार लिएको छ।
यो फिल्म असोज २६ गतेदेखि प्रदर्शन हुँदैछ।
