नारायण गोपाल र आशा भोस्लेको स्वर रहेको चर्चित गीत 'तिम्रो मनमा लुकेको कुरा' रिमेक गरिएको छ।
बिहीबार काठमाडौंमा एक कार्यक्रम गर्दै गीत सार्वजनिक गरिएको हो। ३३ वर्षअघि निर्माण भएको फिल्म 'चिनो' मा समावेश 'तिम्रो मनमा लुकेको कुरा' बोलको गीतमा नारायण गोपाल र आशा भोस्लेको स्वर थियो। रिमेक भर्सनमा शंकर श्रेष्ठ र अन्नु चौधरीको स्वर छ।
कुसुम गजमेरको शब्द रहेको गीतमा रन्जित गजमेरको संगीत छ। सन्तोष राजबाहकले निर्देशन गरेको म्युजिक भिडिओमा भुवन केसी, शर्मिला मल्ल, सुरविर पण्डित, शिशिर भण्डारी, शंकर श्रेष्ठ, अश्विनी शाहीको अभिनय छ।
ज्ञानेन्द्र शर्मा हुमागाईंले छायांकन गरेको म्युजिक भिडिओलाई दिन्सन शाहले सम्पादन गरेका छन्। यो गीतको भिडिओ शिशिर भण्डारीको युट्युब च्यानलमार्फत सार्वजनिक गरिएको छ।
गीत सार्वजनिक कार्यक्रममा बोल्दै संगीतकार रन्जित गजमेरले भने 'त्यतिबेला नारायण गोपाल र आशा भोस्लेले गीतमा न्याय दिएका थिए। दर्शक श्रोताले गीतलाई मन पराइदिनु भएको थियो। नयाँ गायक गायिकाको स्वरलाई अझै मन पराउनु हुनेछ भन्ने मलाई लाग्छ।'
