गायिका समीक्षा अधिकारी पछिल्लो समय गायनका साथै मोडलिङमा समेत सक्रियता बढाउन थालेकी छन्।
विशेषगरी आफ्ना अफिसियल गीतका भिडिओमा उनी स्वयं मोडलका रूपमा प्रस्तुत हुँदै आएकी छन्। यसै क्रममा उनी अभिनीत तथा स्वरबद्ध नयाँ गीत 'शिरमा शिरबन्दी' यतिबेला चर्चामा छ।
समीक्षा र गायक सुवास खत्रीको स्वर रहेको यो गीत चार दिनअघि युट्युबमार्फत सार्वजनिक गरिएको हो। यसको लिरिकल भिडिओ यसअघि नै सार्वजनिक भई चर्चामा आइसकेको थियो। अहिले भिडिओ सार्वजनिक भएपछि गीतले छोटो समयमै राम्रो चर्चा र भ्युज पाएको छ।
बिहीबार दिउँसोसम्म गीतको भिडिओलाई युट्युबमा करिब १४ लाखपटक हेरिएको छ। भिडिओमा समीक्षालाई मोडल तथा अभिनेता प्रभात पाल ठकुरीले अभिनयमा साथ दिएका छन्।
समीक्षा यसअघि पनि आफूले गाएका 'पान बुट्टे रूमाल', 'देउतालाई भाकी', 'ऐना हेरी हेरी' लगायतका गीतको भिडिओमा मोडलिङ गरिसकेकी छन्।
'शिरमा शिरबन्दी' गीतको कुरा गर्दा, यो गीत प्रेमिल, रमाइलो र ठट्यौलीपनले भरिएको छ। युवा-युवतीबीचको रमाइलो सवाल–जवाफ गीतमा सुन्न सकिन्छ।
सुजित खत्रीको शब्द रहेको यस गीतमा गायक सुवास खत्रीकै संगीत छ भने आकाश नेपालीले एरेन्ज गरेका हुन्।
रोशन बिकको कोरियोग्राफी रहेको भिडिओ विशाल घिमिरेको कथा तथा निर्देशनमा बनेको हो।
भिडिओमा बुद्ध थापाको छायांकन र अमृत चापागाईँको सम्पादन छ।
'शिरमा शिरबन्दी' समीक्षा अधिकारीको अफिसियल युट्युब च्यानलमा हेर्न सकिन्छ।
भिडिओः
-1746009348.jpg)
