ग्लोबल नेपाली
स्याङ्जाका एकेन्द्रबहादुर थापा सन् २००५ मा संयुक्त अरब इमिरेट्स (युएई) को ठूलो सहर दुबई पुगे।
त्यसअघि उनी पोखराको 'सेभेन पिक टुर एण्ड ट्राभल एजेन्सी' मा काम गर्थे। उनको काम ट्राभल टिकट तथा बुकिङ काउन्टरमा थियो। त्यहाँ पाँच वर्ष काम गरे।
उनका अनुसार त्यो समय आन्दोलन, हड्ताल र बन्दले हैरान पारेको थियो। काम गर्ने राम्रो वातावरण थिएन। स्थिति सुधार हुने आशा नभएपछि उनले विदेश जाने योजना बनाए।
ट्राभल एजेन्सीमा काम गर्ने हुनाले विदेश जाने प्रक्रियाबारे उनी राम्रो जानकार थिए। तर त्यो समय कामदार भिसा पाउन अलिक कठिन थियो।
'कामदार भिसामा विदेश जाने मान्छे थोरै हुन्थे। भिसा आउन पनि गाह्रो थियो,' एकेन्द्रले भने।
कामदार भिसा पाउने सम्भावना नदेखेपछि सबै प्रक्रिया मिलाए उनी दुई महिनाको भिजिट भिसामा दुबई पुगे। त्यहाँ पुगेपछि कामदार भिसा बनाएर काम सुरू गरे। भिजिट भिसामा गएर काम गर्नु अवैध भए पनि भिसा परिवर्तन गरेर काम गर्न पाइने उनले बताए।
त्यो समय दुबईमा नेपालीको संख्या कम थियो। काम पाउन सजिलो थियो। उनका लागि नेपालमा ट्राभल एजेन्सीमा काम गरेको अनुभव लाभदायी भयो। त्यहाँ पनि ट्राभल एजेन्सीको टिकट काउन्टरमा काम पाए।
सुरूमा उनले मासिक १७ सय दिराम तलब पाएका थिए। आफ्नो खर्च पुर्याएर केही पैसा घर पठाउँथे। कामको सिलसिलामा एयरलाइन्स कम्पनीका मान्छे र व्यवसायीहरूसँग चिनजान भयो।
त्यो समय दुबईमा ट्राभल एजेन्सी थोरै थिए तर मानिसको आवतजावत धेरै थियो। उनले त्यहाँ ट्राभल एजेन्सी व्यवसायको राम्रो सम्भावना देखे। अनुभव छँदै थियो। केही पुँजी पनि जम्मा भयो। उनलाई आफ्नै ट्राभल एजेन्सी चलाउन सक्छु भन्ने आँट आयो।
यतिन्जेलमा दुबईमा काम गरेको ८ वर्ष भएको थियो। तलब साढे ६ हजार ५६५ दिराम थियो।
'चलाउन सक्छु भन्ने त भयो तर विदेशी भूमिमा एक्लै लगानी गर्न आँट आएन। मैले आफ्नो व्यावसायिक योजना निकटस्थ साथीलाई सुनाएँ,' उनले भने।
योजना अनुसार चार जनाको संयुक्त लगानीमा सन् २०१४ मा दुबईको बर दुबईमा 'नमस्ते ट्राभल एण्ड टुरिजम' कम्पनी सुरू भयो। एकेन्द्र कम्पनीका अध्यक्ष हुन्।
कम्पनी खोल्न सुरूमा १० लाख दिराम (नेपाली रूपैयाँ साढे तीन करोडभन्दा बढी) लगानी भयो।
उनका अनुसार दुबईमा जग्गा भाडामा पाइँदैन, किन्नुपर्छ। ट्राभल टिकट बिक्रीका लागि पैसा डिपोजिट (अग्रिम जम्मा) गर्नुपर्छ। यस कारण बढी लगानी भएको उनले बताए।
नमस्ते ट्राभल एण्ड टुरिजम दुबईमा नेपालीले लगानी गरेको यस प्रकारको पहिलो कम्पनी भएको पनि उनको दाबी छ।
एयरलाइन्स र अन्य व्यवसायीसँग चिनजान भएकाले कम्पनी चलाउन गाह्रो भएन। व्यवसाय फस्टाउँदै गयो। सुरूमा ट्राभल टिकट काट्ने सेवा दिएका थिए। बिस्तारै टुर प्याकेज र अन्य सेवा थपे।
काम सुरू गरेको दुई वर्षपछि राजधानी सहर आवुधाबीमा शाखा खोले। हाल नेपालमा पनि दुइटा शाखा छन्। कुल चार कम्पनीमा ३५ जनाले रोजगारी पाएका छन्।
'नमस्ते ट्राभल एण्ड टुरिजमले दुबईमा २० जनालाई रोजगारी दिएको छ। तिनमा धेरैजसो नेपाली छन्। नेपालमा पनि १५ जनाले रोजगारी पाएका छन्,' उनले भने।
ट्राभल टिकटका अरबी, नेपाली, भारतीय, युरोपेली, पाकिस्तानी, बंगाली लगायत आउँछन्। टुर प्याकेजमा सिटी टुर हुन्छ जसमा प्रचलित ठाउँहरूको भ्रमण, क्रुज डिनर र डेजर्ट सफारी हुन्छ। टुर प्याकेजको शुल्क एयरलाइन्सको भाडा अनुसार घटबढ भइरहन्छ।
नमस्ते ट्राभल एण्ड टुरिजमबाट हालसम्म करिब ३५ हजारले टुर प्याकेज सेवा लिएको एकेन्द्रको भनाइ छ। यस्तो सेवा लिनेमा नेपाली ग्राहक बढी छन्।
'संसारका धेरै कुनाका मानिस आवतजावत गर्ने भएकाले दुबईमा व्यवसायको राम्रो अवसर छ,' एकेन्द्रले भने, 'यहाँको नीतिनियम पालना गर्ने हो भने व्यवसाय गर्न सजिलो छ। बन्द, हड्ताल हुँदैन। कम्पनी दर्ता गर्न झन्झट छैन। एक सातामा दर्ता भइसक्छ।'
विद्यार्थीका लागि पनि दुबई निकै राम्रो ठाउँ भएको उनी बताउँछन्। धेरै पैसा खर्च गरेर ठूला देशमा जानुभन्दा दुबईमा पढ्नु राम्रो हुने उनको भनाइ छ।
हाल दुबईमा कम्तीमा पाँच लाख नेपाली रहेको उनको अनुमान छ। आपसी भेटघाट पनि सामान्यजस्तो हुन्छ।
'पहिला त नेपाली भेट्दा पनि परिवारको सदस्य भेटेजस्तो हुन्थ्यो। अहिले धेरै भएर होला, कसैलाई कसैको वास्ता हुन्न,' उनले भने।
दुबईको बर दुबईमा मात्रै हाल तीन दर्जनभन्दा बढी ट्राभल एजेन्सीमा नेपालीको लगानी छ। गहना, रेस्टुरेन्ट, गार्मेन्ट, कन्सल्टेन्सी लगायतमा पनि नेपालीले लगानी गरेका छन्। बर दुबई 'मिनी नेपाल' भनेर चिनिन थालेको उनले बताए।
करिब २० वर्ष दुबईमा बिताएका एकेन्द्र विभिन्न सामाजिक संस्थामा पनि संलग्न छन्। उनका दुई छोरी र एक छोरा छन्। दुई छोरी दुबईमै छन्, छोरा र श्रीमती नेपालमा।
'विदेशमा हासिल गरेको सीप र आर्जित पुँजी स्वदेशमै लगानी गर्ने सोच छ। यसै अनुसार योजना बनाउँदै छु,' उनले भने।
(सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- [email protected]
